BQO-da Jaıyq ózenindegi sýdyń túsi nege ózgerdi – ekologııa departamenti jaýap berdi
ORAL. KAZINFORM — Batys Qazaqstan oblysynda Jaıyq ózeninde sýda kóbik paıda bolyp, jasyl túske boıalǵany jóninde áleýmettik jelide beınejazba jarııalandy.
Turǵynnyń sózine qaraǵanda, oqıǵa Kóshim aýyly tusynda bolǵan.
- Jaıyqqa ne bolǵan? Jasyl kóbikke tolyp tur, - deıdi turǵyn.
Osyǵan baılanysty Kazinform tilshisi BQO boıynsha ekologııa departamentine arnaıy saýal joldaǵan edi.
Departament basshysy Murat Ermekqalıevtiń málim etkenindeı, mekemeniń zerthanalyq-taldamalyq baqylaý bóliminiń mamandary bıylǵy 10 tamyzda beınejazbada kórsetilgen Jaıyq ózeniniń Kóshim bógeti mańyna baryp, tekserý júrgizdi.
Baıqalǵan qubylystyń yqtımal sebepterin anyqtaý maqsatynda mamandar zerthanalyq zertteýler júrgizý úshin jerústi sý synamalaryn aldy.
Zerthanalyq taldaý nátıjeleri boıynsha zerttelgen kórsetkishter boıynsha belgilengen shekti raýaldy kontsentratsııa normatıvterinen asyp ketý faktileri anyqtalǵan joq.
- Tekserý barysynda atalǵan ózen aýmaǵyndaǵy jergilikti balyqshylarmen de áńgime júrgizildi. Olardyń baıqaýynsha, sý túsiniń osyndaı ózgerýi jyl saıyn kún ystyq bolǵan kezeńde baıqalady jáne maýsymdyq sıpatqa ıe. Sonymen qatar atalǵan ýchaske jer bederiniń erekshelikterine baılanysty ózenniń aǵysy sol tusta baıaýlaıdy. Bul sýdyń tez jylynýyna jáne baldyrlardyń jınalýyna yqpal etedi. Osylaısha, ystyq kezeńde sýdyń jasyldaý túske boıalýy sý aıdynynda júretin tabıǵı maýsymdyq protsesterge baılanysty bolýy múmkin, - dedi M.Ermekqalıev.
Eske sala keteıik, budan buryn Oralda qatty turmystyq qaldyqtar polıgonynyń órtenýine baılanysty kásiporynǵa aıyppul salynǵanyn jazǵan edik.
