BQO-da jaıaý júrginshi bóligi qulaǵan kópirdi zertteý jumystary bastaldy
ORAL. KAZINFORM — «Qazaqstan jol ǵylymı-zertteý ınstıtýty» AQ mamandary Oral qalasynda Shaǵan ózeninen ótetin kópirdi zertteý jumystaryn bastady.
Atalmysh kópirdiń jaıaý júrginshi bóligi 30 sáýirde qulaǵan bolatyn.
«QazAvtoJol» UK» AQ BQO fılıalynyń dırektory Asylbek Mardannyń málim etkenindeı, ınstıtýt mamandarynyń qorytyndysyna sáıkes kópirdi kúrdeli jóndeý nemese qaıta qurý júrgizý jóninde sheshim qabyldanatyn bolady.
- Sonymen qatar jaıaý júrginshi bóligin ýaqytsha qalpyna keltirý máselesi qarastyrylyp jatyr. Sondaı-aq kólik qozǵalysynyń jıiligine baılanysty ýaqytsha baǵdarshamdar ornatyldy. Ákimshilik polıtsııanyń kelisimimen qosymsha jol belgileri qoıyldy, - dedi A.Mardan.
Eske sala keteıik, budan buryn BQO-da Shaǵan ózenindegi kópirdiń jaıaý júrginshiler bóligine zaqym kelgenin jazǵan edik.
1962 jyly paıdalanýǵa berilgen kópir respýblıkalyq mańyzy bar Aqtóbe-Oral-Reseı Federatsııasy shekarasy avtomobıl jolynyń 247-shaqyrymynda ornalasqan.
