BQO-da «Jasyl el» baǵdarlamasyna 58 mln teńge bólindi
ORAL. QazAqparat - Batys Qazaqstan oblysynda bıyl «Jasyl el» baǵdarlamasyna 58 mln teńge bólindi. Bul týraly búgin Ortalyq kommýnıkatsııalar qyzmeti óńirlik fılıalynda BQO jastar saıasaty máseleleri basqarmasynyń basshysy Aıan Sakoshev málim etti, dep habarlaıdy «QazAqparat» tilshisi.
Onyń aıtýynsha, bólingen qarjynyń 42 mln teńge «Jasyl el» sarbazdarynyń jalaqysyna, qalǵany uıymdastyrý sharalaryna jumsalmaq.
Bıylǵy bir jańalyq - «Jasyl el» sarbazdarynyń jalaqysy 60 myń teńgege deıin kóterildi.
«Jasyl el» jastar eńbek jasaqtary men stýdenttik qurylys jasaqtarynyń maýsymdyq jumysy 1 maýsymnan bastaldy. Bıylǵy maýsym-qyrkúıek aılarynda «Jasyl el» baǵdarlamasy aıasynda 1175 sarbazdy jáne stýdenttik qurylys jasaqtary boıynsha barlyq aýdandarda 350 sarbazdy jumysqa tartý josparlanyp otyr. Olar aýmaqtar men ózen jaǵalaýlaryn tazalaý, aýla sport alańdaryn kóriktendirý, aǵashtardy otyrǵyzyp, jas kóshetterdi kútý, jol boıyndaǵy ınfraqurylymdy abattandyrý isterimen aınalysady.
«Jasyl el» oblystyq shtaby men «Jaıyq taza qala» JShS, sondaı-aq aýdandardaǵy orman sharýashylyǵy mekemeleri arasynda jastardy jumysqa qabyldaý jóninde memorandýmǵa qol qoıyldy. Oǵan qosa stýdenttik qurylys jasaqtarynyń jumysyn uıymdastyryp, «Nurly jol» baǵdarlamasy aıasynda jastardy jumyspen qamtý úshin óńirdegi qurylys kompanııalarymen kelissózder júrgizildi.
