BQO-da jastardyń tóbelesi vıdeo arqyly tarady
Beınejazbadan kóringenindeı, aldymen olardyń ekeýi alysyp, judyryqtasady.
Keıin oǵan qarap turǵan jigit qosylyp, artynan búıirinen urǵanda, bireýi qulap qalady. Ony tóbelesken jigittiń biri tepkileı bastaǵan mezette vıdeo úziledi.
BQO polıtsııa departamentiniń baspasóz qyzmetinen túsken málimetke qaraǵanda, Bórli aýdandyq polıtsııa bóliminiń qyzmetkerleri beınejazbany zerttep, tóbeleske qatysqandardy anyqtady.
Olardyń ekeýi 1993 jylǵy, bireýi 1995 jylǵy, bári de Aqsaı qalasynyń turǵyndary bolyp shyqty.
Aqsaıdaǵy jaraqat pýnktine 26 jastaǵy jigit júginip, dárigerler qaraǵannan keıin úıine jiberilgen. Oǵan dene jaraqatyn keltirgen 1993 jylǵy jigitke QR Ákimshilik quqyqbuzýshylyq kodeksiniń 434-babyna sáıkes (usaq buzaqylyq) ákimshilik hattama toltyryldy.
«Beınejazba zerttelgennen keıin tóbeleske qatysýshylardyń barlyǵy atalǵan bapqa sáıkes ákimshilik jaýapkershilikke tartyldy», dep habarlady departamenttiń baspasóz qyzmeti.
Bórli aýdany ákimdigi tóbeleske qatysqandardyń bireýi buryn ákimdikte qyzmet atqarǵanyn jetkizdi.
Eske sala keteıik, budan buryn Oralda toı kortejinde «oq atqan» jigittiń ustalǵanyn jazǵan bolatynbyz.