BQO-da jasóspirimder kishkentaı eki balaǵa kúshtep temeki shektirgen

Batys Qazaqstan oblysynda jasóspirimder eki balany temeki tartýǵa kúshtegen, dep habarlaıdy QazAqparat tilshisi.

Áleýmettik jeliden málim bolǵandaı, «NeMolchıKZ» qoryna Báıterek aýdany Mıchýrın aýylynda turatyn balalardyń biriniń anasy shaǵymdanǵan.

Áıeldiń aıtýynsha, uly men onyń dosyn (9 jáne 8 jasar) 13 jasar jasóspirimder shaqyrǵan.

«Balalar oınaýǵa shaqyrǵan dep oılap, artynan ilesken. Jasóspirimder aıaqtalmaı qalǵan qurylysqa kirgizip, qansha ýaqyt ekeni belgisiz, kúshtep ustaǵan. Iyǵynan, ishinen urǵan. Tizerletip, aıaǵynyń arasynan usynylǵan temekini shegýge kúshtegen. Osynyń bárin beınejazbaǵa túsirgen. Ulymnyń dosy buǵan kónip, turyp, temeki tartqan. Meniń ulym temeki tartpaıtynyn, ózin nashar sezingenin aıtyp, jiberýdi ótingen. Biraq olar jibermeı, kezek-kezek murnyna, betine temeki tútinin úrlegen. Tútinge tunshyqqan ulym qulap qalǵan, muny dosy rastady. Al jasóspirimder beınejazbaǵa túsirip, kúlýmen bolǵan. Olar ketip qalǵannan keıin balalar áıteýir úılerine jetken» dep jazady áıel.

Túnde balasy esirip: «Adamdar, kómektesińder, meni zorlap jatyr» dep aıqaılaǵan. 1,5 jarym aı boıy anasy aqyryndap ne bolǵanyn bilgen.

Ulynyń dosy da sondaı kúıde bolǵan.

«NeMolchıKZ» qorynyń jetekshisi Dına Smaıylovanyń habarlaýynsha, ata-analar Mıchýrın polıtsııasyna aryz túsirgen.

BQO polıtsııa departamentiniń baspasóz qyzmeti oqıǵany rastady.

«23 qyrkúıek kúni Báıterek aýdany polıtsııa bólimi Mıchýrın kenttik bólimshesine 1991 jáne 1986 jylǵy áıelder bıylǵy shilde aıynda balalaryn temeki tartýǵa májbúrlegen jasóspirimge shara qoldaný jóninde shaǵym túsirgen. Sol kúni polıtsııa qyzmetkerleri oqıǵaǵa qatysýshylardyń bárin anyqtap, zańdy ókilderiniń qatysýymen jaýap aldy. Qazirgi kezde búkil jınaqtalǵan materıal Báıterek aýdany kámeletke tolmaǵandar isi jónindegi komıssııaǵa qaraýǵa jiberildi» dep habarlady vedomstvodan.