BQO-da jasóspirimder 2800-den astam quqyq buzýshylyq jasaǵan
ORAL. KAZINFORM — Batys Qazaqstan oblysynda 27-29 shilde aralyǵynda «Túngi qaladaǵy balalar» respýblıkalyq jedel aldyn alý is-sharasy ótkizilip jatyr.
BQO Polıtsııa departamenti jergilikti polıtsııa qyzmeti basqarmasynyń bastyǵy, polıtsııa podpolkovnıgi Oljas Ibraıymovtyń óńirlik kommýnıkatsııalar qyzmeti alańynda ótken brıfıngte málim etkenindeı, is-sharanyń maqsaty – balalardyń túngi ýaqytta ata-anasyz nemese zańdy ókilderinsiz júrýin baqylaýdy kúsheıtý jáne jasóspirimder arasyndaǵy quqyqqa qarsy áreketterdiń aldyn alý.
Oljas Ázimbekulynyń sózine qaraǵanda, kámeletke tolmaǵandardyń saǵat 22.00-den tańǵy 06.00-ge deıin oıyn-saýyq mekemelerinde bolýyna jáne saǵat 23.00-den 06.00-ge deıin turǵynjaılardan tys jerlerde zańdy ókilsiz júrýine qatań tyıym salynady.
- Jedel aldyn alý is-sharasynyń alǵashqy kúni barlyǵy 113 ákimshilik hattama toltyryldy. Sonyń ishinde 103 jetkinshektiń túngi saǵat 23.00-den keıin turǵynjaılardan tys jerlerde júrgeni belgili boldy, - dedi O.Ibraıymov.
Onyń aıtýynsha, jyl basynan beri jasóspirimderdiń 2 814 ákimshilik quqyq buzýshylyqqa barǵany anyqtaldy. Sonyń ishinde 1 525-i QR Ákimshilik quqyq buzýshylyq týraly kodeksiniń 442-babyna (kámeletke tolmaǵandardyń zańdy ókilderiniń erip júrýinsiz túngi ýaqytta oıyn-saýyq mekemelerinde nemese turǵynjaıdan tys jerde bolǵany úshin) qatysty. Sondaı-aq 127-bap boıynsha (kámeletke tolmaǵan adamdy tárbıeleý jáne oǵan bilim berý, onyń quqyqtaryn jáne múddelerin qorǵaý jónindegi mindetterdi, qaýipsizdigin qamtamasyz etý jónindegi sharalardy oryndamaý) 296 derek tirkeldi.
- Keıbir jasóspirimniń ózimen birge pyshaq nemese kastet sııaqty tyıym salynǵan zattardy alyp júretinin eske salǵym keledi. Bul QR QK 287-babyna (sýyq qarýdy zańsyz alyp júrý) sáıkes qylmystyq jaýapkershilikke ákeledi. Sonymen qatar kámeletke tolmaǵandardyń qatysýymen bolatyn jol-kólik oqıǵalarynyń sany artty. Negizgi sebepter – belgilenbegen jerden joldy kesip ótý jáne avtokólikte balalardy tasymaldaý erejelerin elemeý. Balalardy avtokólikte arnaıy jasyna jáne salmaǵyna saı avtokreslolarmen ǵana tasymaldaý qajet, - dedi departamenttiń basqarma bastyǵy.
Eske sala keteıik, budan buryn Batys Qazaqstanda jol-kólik oqıǵalarynyń nelikten jıilep otyrǵanyn jazǵan edik.