BQO-da jasóspirim qyzben jynystyq qatynasqa barǵan turǵynǵa úkim shyǵaryldy
ORAL. QazAqparat – Batys Qazaqstan oblystyq qylmystyq ister jónindegi mamandandyrylǵan aýdanaralyq sotynda alqabılerdiń qatysýymen Anatolıı Marchenkoǵa qatysty úkim shyǵaryldy, dep habarlaıdy QazAqparat tilshisi.
Atalmysh sottyń baspasóz qyzmeti málim etkenindeı, A.Marchenko QR QK 120-baby 4-bóligimen (jas balany zorlaý) aıyptalǵan bolatyn.
Aıyptaý aktisine sáıkes sottalýshy 12 jastaǵy jábirlenýshiniń jastyǵyna baılanysty óz is-áreketiniń mánisin túsinbeıtinin paıdalanyp, onymen jynystyq qatynasqa barǵan.
Alaıda alqabıler isti qaraı kele, kópshilik daýyspen jábirlenýshi óziniń dene jáne psıhıkalyq damýyna saı óz áreketin túsine bilgen, jynystyq qatynas onyń kelisimimen jasalǵan degen qorytyndyǵa keldi. Sottalýshy kúsh qoldanbaǵan, zorlyq áreketterine barmaǵan, bul jerde 16 jasqa tolmaǵan jasóspirimmen erikti túrde jynystyq qatynas jasalǵan.
Alqabılerdiń sheshimi jasyryn daýys berý arqyly qabyldanady. Sýdıa buǵan yqpal jasaı almaıdy.
Osylaısha sottalýshynyń áreketi QR QK 122-baby 1-bóligimen (bul aýyrlyǵy ortasha qylmystar sanatyna jatady) saralandy.
Alqabıler A.Marchenkonyń buryn sottalmaǵanyn, bir jasar balasy bar ekendigin, jaǵymdy minezdemesin jazany jeńildetetin mán-jaılar retinde tanydy.
Kópshilik daýyspen sottalýshynyń 2 jyl 6 aıǵa bas bostandyǵy shekteldi.
Úkim zańdy kúshine engen joq.
Eske sala keteıik, budan buryn BQO sport basqarmasynyń burynǵy basshysyna qatysty sot qaýlysy shyqqanyn jazǵan bolatynbyz.
