BQO-da jas bosanǵan eki ananyń ólimi boıynsha tekseris júrip jatyr – Ajar Ǵınııat

ORAL. QazAqparat – Batys Qazaqstan oblysynda jas bosanǵan eki ananyń ólimi boıynsha tekseris júrip jatyr. Bul týraly óńirlik kommýnıkatsııalar qyzmeti alańynda ótken brıfıngide óńirde jumys saparymen júrgen QR Densaýlyq saqtaý mınıstri Ajar Ǵınııat málim etti, dep habarlaıdy QazAqparat tilshisi.

Mınıstrdiń aıtýynsha, ana men bala densaýlyǵyn qorǵaý – saladaǵy basym baǵyttardyń biri.

«Osyǵan baılanysty óńirde oryn alǵan eki ananyń ólimine baılanysty komıssııa jumys isteýde. Ár túrli taldamalar alynady, bıopsııa jasaıdy. Zertteýlerdiń qorytyndysy shyǵýy kerek. Qujattary tekserý organdarynda bolsa, olardy alyp qaraý qajet. Munyń bári ýaqyt alady. Komıssııa qorytyndysy shyqqan kezde habarlanady», dedi QazAqparat tilshisiniń saýalyna jaýap bergen A.Ǵınııat.

Onyń sózine qaraǵanda, ótken jyly jalpy respýblıka boıynsha ana men bala ólim-jitimi boıynsha ósim boldy, bul koronavırýs indetiniń órshýine baılanysty. Bıyl elimizde ana ólimi 50 paıyzǵa azaıyp otyr. Al Batys Qazaqstan oblysynda qaıǵyly jaǵdaılardyń oryn alýy alańdatady.

Jalpy, óńirde júkti jáne bosanǵan áıelderge 17 medıtsınalyq mekeme qyzmet kórsetedi.

«Búgin Oraldaǵy oblystyq perınataldyq ortalyqtyń jumysymen tanystym. Óńirde durys jabdyqtalǵan, halyqaralyq talaptarǵa saı keletin perınataldyq ortalyqtyń kerektigi talas týǵyzbaıdy. Qazirgi ortalyqtyń jumys deńgeıi tómen ekeni kórinip tur», dedi Densaýlyq saqtaý mınıstri.

Onyń atap ótkenindeı, Memleket basshysynyń tapsyrmasyna sáıkes óńirge jumys sapary kezinde ákimdikte oblystyń densaýlyq saqtaý salasynyń ózekti máseleleri talqylandy.

«Oblys ákimdigi medıtsına salasy aldynda turǵan mindetterdi sheshý baǵytynda aldaǵy úsh jylǵa arnaıy jospar jasaǵan eken. Birinshiden, densaýlyq saqtaý nysandarynyń materıaldyq-tehnıkalyq bazasyn nyǵaıtý. Sonymen qatar 2025 jylǵa deıin jańadan 46 nysan salý oılastyrylýda. Ekinshiden, bilikti kadrlarmen qamtamasyz etý. Mysaly, oblysta 270-ten astam dáriger jetispeıdi. Sondyqtan jas mamandarmen tolyqtyrý, olardy oqytý, jergilikti jerde jaǵdaı jasaý asa mańyzdy. Mine, osyndaı kókeıkesti máselelerdi sheshý úshin mınıstrlik te óz tarapynan qoldaý kórsetetin bolady», dep túıindedi sózin Ajar Ǵınııat.

Eske sala keteıik, budan buryn Oral aýrýhanasynda egizdi dúnıege ákelgen kelinshektiń kóz jumǵanyn jazǵan bolatynbyz.