BQO-da «Jarııa» qoǵamdyq birlestigine qatysty alaıaqtyq boıynsha tergeý júrgizilip jatyr
ORAL. KAZINFORM — Batys Qazaqstan oblysynda polıtsııa «Jarııa» qoǵamdyq birlestiginiń basshylaryna qatysty alaıaqtyq deregi boıynsha tekserýdi bastady.
BQO polıtsııa departamentiniń málimetine qaraǵanda, qylmystyq isti bastaýǵa qoǵamdyq birlestik basshylarynyń yqtımal alaıaqtyq áreketterine tap bolǵanyn málimdegen eki azamattyń aryzy sebep bolǵan.
Ótinish berýshiler uıymnyń qyzmetine qatysqan kezeńde ózderiniń jeke qarajatynan aıyrylyp, sonyń saldarynan materıaldyq shyǵynǵa ushyraǵanyn alǵa tartady.
Áńgime birlestik qatysýshylary arasynda uıymdy jarnamalaý men ilgeriletýge arnalǵan qarajat jınaý, sondaı-aq túrli is-sharalarǵa qatysýǵa baılanysty jol júrý, tamaqtaný jáne turý shyǵyndaryn óz qarajaty esebinen tóleý týraly bolyp otyr. Aryzdanýshylardyń sózinshe, uıym basshylyǵy jumsalǵan qarajatty birneshe ret ótep berýge ýáde etken, alaıda aqshany áli kúnge deıin qaıtarmaǵan.
- Aryzdanýshylardyń túsiniktemesine sáıkes, anyqtalǵan tulǵalar qoǵamdyq birlestiktiń ókilderi bola otyryp, uıym qyzmet etken kezeńde olardyń aqshalaı qarajatyn ıemdengen. Atalǵan derek boıynsha qylmystyq is qozǵaldy, – delingen Batys Qazaqstan oblysy polıtsııa departamentiniń túsiniktemesinde.
Polıtsııanyń habarlaýynsha, qazirgi ýaqytta oqıǵanyń mán-jaıyn anyqtaýǵa jáne aryzdanýshylardyń ýájderin tekserýge baǵyttalǵan qajetti tergeý áreketteri júrgizilip jatyr. Tergeý aıasynda iske qatysy bar barlyq tulǵanyń áreketine quqyqtyq baǵa beriledi.
Eske sala keteıik, budan buryn Oralda burynǵy polıtseıdiń pyshaq jaraqatyna qatysty qylmystyq is qozǵalǵanyn jazǵan edik.
