BQO-da jarylys júrgizilgen ózende muzdyń qaıta qatyp qalǵany ras pa

«Krıstall» baý-baqsha seriktestiginiń turǵyny málim etkenindeı, 2 naýryz kúni bir-aq jerde muz jarý jumysy júrgizildi. Onda da keptelis bolatyn jerde emes.

- Sodan keıin qatty aıaz bolyp, muz tolyqtaı qatyp qaldy. Sonda qarjy ne úshin bólingen? Mundaı jarylystar 2024 jyly bolyp edi. Aıaǵynyń nemen bitkenin bárimiz bilemiz. Ótken jyly BQO TJD qyzmetkerleriniń is-áreketi nátıjesinde qajetti jerlerde muz jarylystary jasaldy. Barlyǵy oıdaǵydaı ótti. Bıyl «Vıshenka-3» baý-baqsha seriktestigi aýdanynda Shaǵannyń burylystary bar jerde muz jarylǵan joq. Qazir kún jylynyp jatyr, kóp uzamaı seń júredi. 2024 jylǵy tasqyn qaıtalana ma dep qorqamyz. Shuǵyl shara alýdy suraımyz, - deıdi turǵyn.

Osyǵan oraı Kazinform tilshisi máseleniń anyq-qanyǵyn bilý úshin BQO ákimdigine arnaıy saýal joldaǵan edi.

Ákimdikten túsken málimetke qaraǵanda, atalǵan aqparat shyndyqqa sáıkes kelmeıdi. Jarylys jumystary kóktemgi tasqyn kezinde keptelis bolmas úshin muz qabatyn usaqtaý maqsatynda júrgizildi. Sodan keıin túngi ýaqytta aýa temperatýrasy tómendegen kezde juqa muz qabaty paıda bolýy múmkin. Bul tabıǵı kórinis bolyp esepteledi, muz qaıtadan qatyp qalady degen sóz emes.

- Jarylys júrgizýdegi basty mindet – muz qabatyn buzý, buǵan qol jetkizildi. Usaqtalǵan muz neǵurlym tez sógiledi jáne kún jylynyp, sý kóbeıgen kezde ózen arnasymen jyldamyraq ótedi. Kúni búginge deıin 38 myń sharshy metr jerge jarylys jumystary júrgizildi. Onyń ýaqyty ýákiletti organdardyń uzaq merzimdi boljamyna sáıkes aıqyndaldy. Ózenderdegi jaǵdaı tıisti qyzmetterdiń turaqty baqylaýynda. Muzǵa monıtorıng júrgizý jalǵasýda. Turǵyndarǵa resmı aqparat kózderine senip, dálelsiz málimetterdi taratpaýdy ótinemiz, - delingen resmı jaýapta.

Batys Qazaqstan oblysynda 9, 10 naýryzda kún túnde 24 gradýsqa deıin sýytqan bolatyn.

Eske sala keteıik, budan buryn BQO ózenderinde muz jarý jumystary qalaı júrgizilip jatqanyn jazǵan bolatynbyz.