BQO-da janýarlardyń tisteýinen zardap shekkender sany 2 500-den asty

ORAL. KAZINFORM — Batys Qazaqstan oblysynda bıylǵy on aıda janýarlardyń tisteýinen 2 502 adam zardap shekse, sonyń 856-sy – balalar.

aýrýy
Foto: DSM

BQO sanıtarııalyq-epıdemıologııalyq baqylaý departamentiniń baspasóz mamany Kenjegúl Muhıtovanyń málim etkenindeı, japa shekkenderdiń basym bóligi ıtterdiń shabýylynan jaraqat alǵan. Atap aıtqanda, 1 705 adamdy ıt qapsa, 666-syn mysyq tistegen. 

Oǵan qosa ózge janýarlardyń tisteýi saldarynan 129 adam medıtsınalyq kómekke júgingen. 

- Janýarlardyń tisteýi adam densaýlyǵy úshin qaýipti. Ásirese, ıesi belgisiz jáne qaraýsyz júrgen ıt jáne basqalarmen baılanys kezinde saqtyq sharalaryn qatań saqtaý qajet, - deıdi K.Muhıtova. 

Mamandar sondaı-aq janýarlardy úrkitpeý, mazalamaý jáne olarǵa tas laqtyrmaý kerektigin eske salady. Balalardy qaraýsyz qaldyrmaı, ıt-mysyqpen qarym-qatynas jasaý kezinde baqylaýda ustaý mańyzdy. Janýar tistegen jaǵdaıda ýaqyt joǵaltpaı medıtsınalyq kómekke júginý – qutyrý sııaqty asa qaýipti aýrýdyń aldyn alýdyń mańyzdy sharasy.

Departament málimetine sáıkes oblysta jyl basynan beri qutyrý aýrýy tirkelgen joq.

Eske sala keteıik, budan buryn BQO-da JRVI juqtyrǵandardyń 6 myńnan astamy balalar ekendigin jazǵan edik.