BQO-da janýarlardan 1 300-den astam adam zardap shekti

ORAL. KAZINFORM — Batys Qazaqstan oblysynda janýarlardan zardap shekken adamdar sany kóbeıdi.

BQO sanıtarııalyq-epıdemıologııalyq baqylaý departamentiniń basshysy Dınara Jańabergenovanyń málim etkenindeı, bıylǵy alty aıda janýarlardan jaraqat alǵan 1 333 adam medıtsınalyq kómekke júgindi.

Onyń sózine qaraǵanda, bul ótken jylǵy osy kezeńdegiden (1 296) asyp ketip otyr.

- Sonyń ishinde 942 adamdy ıt qapqan. 341-i mysyqtan, tórteýi jylqydan, 10-y iri qaradan, 35-i basqa janýarlardan zardap shekti. Degenmen adamdar arasynda qutyrma aýrýy tirkelgen joq, - dedi D.Jańabergenova.

Departament basshysynyń aıtýynsha, bıyl Aqjaıyq, Báıterek, Qaratóbe jáne Tasqala aýdanynda 4 adamnyń brýtsellezge shaldyqqany tirkeldi. Bul 100 myń turǵynǵa shaqqanda, 0,6-dan keledi. Barlyq jaǵdaıda aýrý melitensis qozdyrǵyshynan týyndaǵan jáne adamdar malmen tyǵyz qarym-qatynas jasaǵan kezde juqtyrǵan.

Ótken jylǵy osy kezeńmen salystyrǵanda, brýtsellez 16 derekke kemigenimen, óńirde áli de kezdesip otyr.

- Brýtsellezdiń aldyn alý úshin maldy jyl saıyn tekserýden ótkizý qajet. Sondaı-aq jeke qorǵanysh quraldaryn qoldanyp, mal dárigeriniń ruqsatynsyz et pen sútti satpaý kerek. Oǵan qosa ónimderdi tek ruqsat etilgen oryndardan satyp alý mańyzdy, - dedi D.Jańabergenova.

Eske sala keteıik, budan buryn Batys Qazaqstanda epıdemıolog mamandar jetispeıtinin jazǵan edik.