BQO-da jansaqtaý bóliminde jatqandar sany ósti
BQO densaýlyq saqtaý basqarmasy basshysynyń mindetin atqarýshy Arman Qalıbekovtiń málim etkenindeı, jansaqtaý bólimshesinde jatqandar sany sońǵy aptada (1-7 shildede orta eseppen 44 emdelýshi) aldyńǵymen (24-30 maýsym, 39) salystyrǵanda 11,4 paıyzǵa kóbeıdi.
Arman Talǵatulynyń sózine qaraǵanda, bulardyń úsheýi – 50-ge deıingiler, 10-y – 50-60, 33-i – 60-80 jas aralyǵyndaǵylar, jeteýi – seksennen asqandar.
Jansaqtaý bólimshesinde jatqandardyń 57 paıyzynda (43-inde) sozylmaly dertteri bar. Sonyń ishinde 28-i júrek-qan tamyrlary aýrýlary, 15-i qant dıabetine shaldyqqan.
Jyl basynan beri oblysta 246 adam koronavırýstan kóz jumsa, sonyń 72 paıyzy (175-i) – 65-ten asqandar, 27 paıyzy (66-sy) – 40-65 jas aralyǵyndaǵylar, 1 paıyzy (5) – 40-qa deıingiler.
Kóz jumǵandardyń 90 paıyzynda (221) sozylmaly dertteri bolǵan.
«Vırýstyń mýtatsııalanyp, kovıdtiń jańa shtamdarynyń paıda bolýyna baılanysty ınfektsııalyq statsıonarlar men jansaqtaý bólimshelerine túsip jatqan naýqastar kóbeıýde. Olardyń sozylmaly dertteriniń bolýy da jaǵdaıdy qıyndatyp otyr. Sondyqtan turǵyndarǵa ózderin jáne jaqyn týystaryn indetten qorǵaý úshin karantındik sharalardy qatań saqtaý kerektigin eske salamyz», dedi A.Qalıbekov.
Eske sala keteıik, budan buryn Batys Qazaqstanda sońǵy aptada koronavırýs juqtyrǵandar sany 41 paıyzǵa óskenin, osyǵan baılanysty qosymsha shekteý sharalaryn engizý usynylǵanyn jazǵan bolatynbyz.