BQO-da jańǵyrtylǵan aýyldyq kitaphana paıdalanýǵa berildi
ORAL. KAZINFORM — Batys Qazaqstan oblysyndaǵy Taıpaq aýyldyq kitaphanasy modernızatsııadan keıin esigin aıqara ashty, dep habarlaıdy oblys ákimdiginiń baspasóz qyzmeti.
Aýyldastardyń qýanyshyna ortaqtasyp, sharaǵa BQO ákiminiń orynbasary Qaıyrjan Meńdiǵalıev, Mádenıet jáne aqparat mınıstrligi Arhıv, qujattama jáne kitap isi komıteti tóraǵasynyń orynbasary Rollan Quspan, «Qazaqstan halqyna» qoǵamdyq qory basqarmasynyń tóraǵasy Lıazzat Shyńǵysbaeva, osy jobanyń ıdeıa avtory ári «TANA» qoǵamdyq qorynyń jetekshisi Kamıla Luqpanova jáne basqa da qurmetti qonaqtar qatysty.
Aldymen kópshilikti oblys ákiminiń orynbasary Qaıyrjan Ermekuly júrekjardy lebizin bildirip, bul rýhanı ordanyń aýdanda modernızatsııadan ótken ekinshi kitaphana ekenin aıtty. Byltyrdan bastalǵan ıgi bastamanyń nátıjesinde oblystyń barlyq aýdanynan kitaphanalar iriktelip alynyp, 25 nysanda modernızatsııalaý jumystary júrgizilgen. Bul berekeli iske «Qazaqstan halqyna» qoǵamdyq qory men «Tana» qoǵamdyq qory qoldaý bildirdi.
Modernızatsııadan tolyq ótip, jańa kelbetke engen kitaphananyń lentasyn Q.Meńdiǵalıev, Mádenıet jáne aqparat mınıstrligi zań departamentiniń dırektory Álibek Baıjumanov, Lázzat Shyńǵysbaeva jáne eńbek ardageri, «Aqjaıyq aýdanynyń qurmetti azamaty» Ǵaınolla Sadyrov qıdy.
Zamanaýı kitaphana oqyrmandy ilim men bilimge jeteleıtin rýhanı orta retinde qaıta jańǵyrǵan. Aýdan kitaphanashylary onyń ár bólimin kelgenderge tanystyryp shyqty. Aıtalyq, munda kitap oqý alańynda oqyrmandardyń ádebıet álemine alańsyz enýine barlyq jaǵdaı jasalǵan. Kitaphananyń bir bólmesi jasóspirimderdiń talǵamyna saı jasaqtalypty. Munda bos ýaqytty tıimdi ótkizip, debat, shyǵarmashylyq baıqaý, t. b. zııatkerlik sharalar ótkizýge bolady. Al búldirshinderge arnalǵan «KidLib» buryshynan san túspen kózdiń jaýyn alatyn 3D kitaptar, oıynshyqtar, oılaý qabiletin jetildiretin túrli oıyndar oryn alǵan.
Rýhanııat jáne medıa alańdarynda, prezentatsııa zalynda túrli formattaǵy sharalar ótkizýge múmkindik molynan. Sonymen qatar kompıýter, zamanaýı medıa qurylǵylardy da erkin paıdalanýǵa bolady.
Jańa kitaphana sheksiz múmkindikterdiń keńistigine aınalǵanynyń aıqyn dáleli — munda bı zaly, kórme zaly jasaqtalyp, múgedek jandardyń erkin qyzmet alýy da qarastyrylǵan.