BQO-da jańajyldyq merekelerge qatysty 362 nysan esepke alyndy
ORAL. KAZINFORM — «Qaýipsiz jańa jyl» jáne «Pırotehnıka» respýblıkalyq is-sharasy aıasynda Batys Qazaqstan oblysynda jańajyldyq merekelerge oraı aldyn alý jumystary júrgizilip jatyr.
BQO TJD memlekettik órt baqylaý basqarmasynyń bastyǵy Mereke Jumaǵalıevtiń óńirlik kommýnıkatsııalar qyzmeti alańynda ótken brıfıngte málim etkenindeı, aktsııanyń negizgi maqsaty — merekelik is-sharalardy uıymdastyrý jáne ótkizý kezinde órt qaýipsizdigi erejeleri men talaptaryn saqtaý máselelerine qoǵamnyń nazaryn aýdarý.
Mereke Baýyrjanulynyń sózine qaraǵanda, jergilikti atqarýshy organdarmen birlesip jańajyldyq merekelerdi ótkizýge tartylǵan nysandardyń esebi júrgiziledi.
— Qazirg oblys boıynsha 362 nysan esepke alynsa, sonyń 327-si — bilim berý, jeteýi — mádenı demalys oryndary, 12-si — múmkindigi shekteýli jandarǵa arnalǵan mekemeler. Osy nysandardyń órtke qarsy jaı-kúıi tekserilip, ákimshilik pen qyzmetkerlerge usynym hattar taratyldy. Órt qaýipsizdigi talaptary túsindirildi, sondaı-aq turaqty monıtorıng júrgizilip jatyr, — dedi M.Jumaǵalıev.
Onyń aıtýynsha, qalalyq jáne oblystyq mańyzy bar jańajyldyq mádenı-buqaralyq is-sharalardy ótkizetin nysandar aýmaǵynda órt sóndirý tehnıkasyn qoıý kózdelip otyr. 5 jeltoqsannan bastap oblys aýmaǵynda polıtsııa departamentimen birlesip adamdar kóp jınalatyn jáne pırotehnıkalyq buıymdar satylatyn oryndarda 76 reıdtik is-shara ótkizilgen. Bul baǵyttaǵy jumystar 2026 jylǵy 3 qańtarǵa deıin jalǵasady.
Basqarma bastyǵy sondaı-aq pırotehnıkalyq buıymdardy satyp alý kezinde ónimniń sertıfıkatyna, jaramdylyq merzimine, qaptamanyń bútindigine jáne nusqaýlyqtyń bolýyna nazar aýdar qajettigin jetkizdi. Oǵan qosa atalǵan buıymdardy qoldanýda qaýipsizdik sharalaryn qatań saqtaý kerektigin eske saldy.
BQO polıtsııa departamenti qoǵamdyq qaýipsizdik basqarmasynyń bastyǵy, polıtsııa podpolkovnıgi Oljas Ibraıymovtyń málimdeýinshe, pırotehnıkany úı-jaılarda, turǵyn úılerge jaqyn aımaqtarda, bilim berý jáne medıtsınalyq uıymdardyń janynda, sondaı-aq adamdar kóp jınalatyn oryndarda qoldanýǵa jol berilmeıdi.
Balalar men jasóspirimderdiń pırotehnıkany eresekterdiń baqylaýynsyz qoldanýyna jol bermeý mańyzdy.
— Pırotehnıkalyq buıymdardy zańsyz satqan jaǵdaıda QR Ákimshilik quqyq buzýshylyq kodeksiniń 196-babyna sáıkes 25 AEK kóleminde aıyppul salynady. Al eldi mekenderde pırotehnıkalyq buıymdardy qoldanǵany úshin atalmysh kodekstiń 436-babyna sáıkes ákimshilik jaýapkershilik (sol buıymdardy tárkileýmen birge 20 AEK kóleminde aıyppul salý) qarastyrylǵan. Bul zań buzýshylyq jyl ishinde qaıtalanǵan jaǵdaıda aıyppul kólemi 30 AEK-ke deıin ulǵaıtylady, — dep qosty O.Ibraıymov.
Eske sala keteıik, budan buryn BQO-da órtten qaza bolǵandar sany týraly jazǵan edik.