BQO-da janarmaı baǵasyn negizsiz kótergen JQS-larǵa aıyppul salyndy

ASTANA. QazAqparat - QR UEM Tabıǵı monopolııalardy retteý jáne básekelestikti qorǵaý komıtetiniń BQO boıynsha departamenti Batys Qazaqstan oblysynda AI-92 benzınin bólshek saýdada ótkizýshilerge qatysty tergep-tekserýdi aıaqtady. Bul týraly TMR BQK-nyń baspasóz qyzmeti habarlady.

Benzındi bólshek saýdada ótkizýshiler -  «Azov» JShS, «Oktan» JShS, «Oral-JanOıl» JShS, «Mýnaı Prom» JShS, «Neftek Opereıtıng» JShS, «Moskvıchı» JShS, «Ýralsk AZS Servıs» JShS jáne «Oral Termınal» JShS-laryna qatysty monopolııaǵa  qarsy zańnamany buzýshylyqtardy  tergep-tekserý aıaqtalǵan.

Tergep-tekserý barysynda, atalǵan naryq sýbektilerinde is júzinde bir mezgilde 4 qyrkúıekten bastap 10 qyrkúıekke deıin,  AI-92 markaly benzınniń baǵasy kóterilgeni anyqtaldy.

Barlyq  naryq  sýbektilerine teń áser etetin jaǵdaılardyń áseri bolǵan joq, óıtkeni 2015 jylǵy 4 qyrkúıekte «eski» baǵamen satylyp alynǵan benzınniń jetkilikti kólemde qory bola turyp, benzınniń jetkizilgen jańa kólemderi baǵalardyń tıisti ózgerýi deńgeıine deıin qunyn ósirilgen. Bul is-áreketter monopolııaǵa qarsy zańnamaǵa sáıkes kelisilgen is-áreket dep tanyldy.

Atalǵan naryq sýbektilerine qatysty ákimshilik is qozǵalyp, Oral qalasynyń mamandandyrylǵan ákimshilik sotyna joldandy. Monopolııaǵa qarsy zańnamany buzǵany úshin JJM-dy ótkizýshilerge jalpy somasy 3,5 mln teńge aıyppul  túrindegi ákimshilik  jaza qoldanyldy.