BQO-da jańadan taǵaıyndalǵan sýdıalar tanystyryldy
ORAL. KAZINFORM — Oblystyq sottyń jalpy otyrysynda Batys Qazaqstan oblystyq sotynyń tóraǵasy Azat Іzbasarov Qazaqstan Respýblıkasy Prezıdentiniń 2026 jylǵy 29 shildedegi № 1382 Jarlyǵymen taǵaıyndalǵan sýdıalardy ujymǵa tanystyrdy.
BQO sotynyń baspasóz qyzmetinen málim etkenindeı, oblystyq sot tóraǵasy óz sózinde bul taǵaıyndaý kásibı biliktiliktiń joǵary baǵalanýy ǵana emes, sonymen qatar qoǵam aldyndaǵy úlken jaýapkershilik ekenin atap ótti.
Sondaı-aq sýdıalarǵa zań ústemdigin qamtamasyz etý, táýelsizdik pen beıtaraptyq qaǵıdattaryn buljytpaı saqtaý, azamattardyń quqyqtary men zańdy múddelerin qorǵaý, sot tóreliginiń sapasy men sot júıesine degen qoǵamdyq senimdi odan ári nyǵaıtý baǵytynda adal qyzmet atqarýǵa tilektestigin bildirdi.
Prezıdent Jarlyǵyna sáıkes Baısal Aıdashev Bórli aýdandyq sotynyń sýdıasy bolyp taǵaıyndaldy.
Baısal Aıtjanuly 1993 jylǵy 9 qańtarda Almaty qalasynda dúnıege kelgen.
2014 jyly Ál-Farabı atyndaǵy Qazaq ulttyq ýnıversıtetin, 2015 jyly І.Jansúgirov atyndaǵy Jetisý memlekettik ýnıversıtetin támamdaǵan.
Ár jyldary Astana qalasynyń mamandandyrylǵan aýdanaralyq ákimshilik sotynda sot prıstavy, bas maman — sot otyrysynyń hatshysy, mamandandyrylǵan aýdanaralyq ekonomıkalyq sotynda jáne Esil aýdandyq sotynda bas maman — sot otyrysynyń hatshysy boldy.
Sonymen qatar QR Sot ákimshiliginiń Astana qalasy boıynsha departamentiniń qujattamalyq qamtamasyz etý bóliminde bas maman — sot otyrysynyń hatshysy laýazymdarynda qyzmet atqarǵan.
Aıym Jaǵypparova Oral qalalyq sotynyń sýdıasy qyzmetine kiristi.
Aıym Jaǵypparova 1992 jylǵy 19 jeltoqsanda Shyǵys Qazaqstan oblysy Aıagóz qalasynda dúnıege kelgen.
2014 jyly Qazaq gýmanıtarlyq-zań ýnıversıtetin, 2023 jyly M.Nárikbaev atyndaǵy Qazaq gýmanıtarlyq-zań ýnıversıtetin támamdaǵan.
Eńbek jolyn zańgerdiń kómekshisi retinde bastap, keıin Astana qalasy advokattar alqasynda taǵylymdamadan ótken. Ártúrli kezeńderde zańger kómekshisi, bas zańger, qyzmetterin atqarǵan.
Aqjaıyq aýdandyq sotyna sýdıa bolyp Roza Muqasheva keldi.
Roza Aıdarqanqyzy 1988 jylǵy 12 jeltoqsanda Qaraǵandy oblysy Molodejnyı aýylynda dúnıege kelgen.
2012 jyly S. Toraıǵyrov atyndaǵy Pavlodar memlekettik ýnıversıtetin, 2012 jyly Kókshe akademııasyn támamdaǵan.
Ár jyldary Aqmola oblysy boıynsha sot aktilerin oryndaý departamentiniń Ereımentaý aýmaqtyq bóliminde is júrgizýshi, Ekibastuz qalalyq soty ákimshisinde bas maman — sot otyrysynyń hatshysy qyzmetin atqarǵan.
Oral qalasynyń № 2 sotyna Altyn Oralbaeva qosyldy.
Altyn Abzalqyzy 1983 jylǵy 18 jeltoqsanda Mańǵystaý oblysy Beıneý aýdanynda dúnıege kelgen.
2007 jyly Q.Jubanov atyndaǵy Aqtóbe memlekettik ýnıversıtetin támamdaǵan.
Ár jyldary Aqtóbe qalalyq sotynda bas maman — sot otyrysynyń hatshysy, Qarasaı aýdandyq sotynda bas maman, Aqtóbe qalasynyń № 2 sotynda bas maman — sot otyrysynyń hatshysy boldy.
Іs-shara sońynda oblystyq sot ujymy jańadan taǵaıyndalǵan sýdıalardy quttyqtap, kásibı qyzmetterine tabys, ádildik pen parasattylyq, zań ústemdigin qamtamasyz etý jolyndaǵy jaýapty qyzmetterine sáttilik tiledi.
Eske sala keteıik, budan buryn BQO-da birqatar sýdıa men sot tóraǵalary taǵaıyndalǵanyn jazǵan edik.
