BQO-da jańadan segiz depýtat saılandy
ORAL. QazAqparat - Batys Qazaqstan oblysynda shyǵyp qalǵandardyń ornyna jańadan segiz depýtat saılandy. Bul týraly óńirlik kommýnıkatsııalar qyzmeti alańynda BQO saılaý komıssııasynyń tóraǵasy Ǵaısa Qapaqov málim etti, dep habarlaıdy «QazAqparat» tilshisi.
Onyń aıtýynsha, 29 qazan kúni ótken saılaý qorytyndysy boıynsha Batys Qazaqstan oblystyq máslıhatyna «Aqsaıgazservıs» AQ prezıdenti Tilek Shektibaev, Oral qalalyq máslıhatyna «Vodokanalstroıservıs» JShS dırektory Ánýar Muqataev depýtat bolyp saılandy. Sondaı-aq «Project Group» JShS-niń aýdarmashysy Málıka Mahaýova Bórli, M.Yqsanov atyndaǵy Jánibek kolledjiniń dırektory Berik Ihsanov Jánibek, Qaztalov aýyldyq okrýginiń ákimi Sársenbaı Moldashev pen «Raıymbek» sharýa qojalyǵynyń jetekshisi Rýslan Sarbaev Qaztalov, jeke kásipker Qaırat Ádilhanov pen Terekti kolledji dırektorynyń orynbasary Ersaıyn Násipov Terekti aýdandyq máslıhatynyń depýtaty atandy.
«Barlyq deńgeıdegi saılaý komıssııalarynyń jumysy bekitilgen kúntizbelik josparǵa saı júrgizildi. Saılaýǵa barlyǵy 26 kandıdat usynyldy. Onyń 18-i ózin-ózi usynsa, qalǵan 8-i saıası partııa atynan tústi. Saılaýshylardyń 71,59 paıyzy daýys berýge qatysty. Onyń barysyn saıası partııalar men senim bildirgen adamdar qatarynan 96 baıqaýshy jáne 7 BAQ ókili baqylap otyrdy. Barlyq saılanǵan depýtattar joǵary bilimdi, onyń ishinde bireýi áıel bolsa, qalǵan jeteýi - er adamdar. Sondaı-aq olardyń ekeýi bıznes ókilderi, ekeýi jeke kásipker bolsa, úsheýi - bilim salasynyń ókilderi, bireýi - aýyldyq okrýg ákimi. Saılanǵan depýtattardyń ortasha jasy - 49,3. Aıta keteıin, saılaý komıssııalaryna aryz-shaǵym túsken joq», dedi Ǵ.Qapaqov.
