BQO-da jańadan salynǵan mektep ǵımaraty eki jyl ótpeı nelikten jabyldy
ORAL. KAZINFORM — Batys Qazaqstan oblysy Terekti aýdany Aqsýat aýyldyq okrýgine qarasty Magıstral jalpy orta bilim beretin mektebi qazirgi kezde jabyq tur. Osyǵan oraı Kazinform tilshisi oqıǵa ornynda bolyp, máseleni zerdelep kórdi.
Budan eki jylǵa jýyq ýaqyt buryn sán-saltanatpen ashylǵan nysan «AMANAT» partııasynyń 2023-2027 jyldarǵa arnalǵan «Halyqpen birge!» baǵdarlamasy aıasynda boı kótergen.
BQO bilim basqarmasynyń málimetine qaraǵanda, Magıstralnyı aýylyndaǵy atalǵan mektep ǵımaraty 2023 jyldyń jeltoqsan aıynda paıdalanýǵa berilgen.
— Nysannyń tapsyrys berýshisi «QPO b. v.» kompanııasy bolsa, jobalyq-smetalyq qujattamany Terekti aýdanynyń qurylys bólimi ázirlegen. Jer telimin anyqtaý jáne bólý jumystaryn jergilikti atqarýshy organdar júzege asyrǵan, — delingen basqarma bergen resmı jaýapta.
Mektep dırektory Gaýhar Orazovanyń málim etkenindeı, osynda basshy bolyp bıylǵy 21 qazanda kelgen.
Onyń sózine qaraǵanda, qabyrǵalarda paıda bolǵan jaryqshaqtardyń úlkeıgenin kórgennen keıin Terekti aýdandyq bilim berý bólimine habar bergen. Balalar qaýipsizdigin qamtamasyz etý baǵytynda mektep ǵımaratyn ýaqytsha jabý týraly sheshim qabyldandy.
Mektepte barlyǵy 120 oqýshy bilim alady. Qazirgi tańda bastaýysh synyptar men mektepaldy daıarlyq tobyndaǵy 36 bala 5 shaqyrymdaı qashyqtyqtaǵy Poıma, qalǵan 5-11 synyptaǵy shákirtter okrýg ortalyǵy Aqsýat aýylyndaǵy mektepte ekinshi aýysymda oqyp jatyr.
Dırektordyń aıtýynsha, eki avtobýs birneshe reıs jasap, oqýshylardy tasymaldaıdy. Ata-analarmen, sondaı-aq ustazdarmen túsinik jumystary júrgizildi. Kezekshi muǵalimder oqýshylarmen birge baryp, keledi. Atalǵan eki aýyldaǵy mektepterde balalardyń oqýyna, tamaqtanýyna jaǵdaı jasalǵan.
— Tapsyrys berýshi «QPO b. v.» kompanııasy bolsa, merdigeri — almatylyq «Ka-Stroı LTD» JShS. Kepildik merzimi osy jyldyń jeltoqsan aıyna deıin. Tehnıkalyq zertteý qorytyndysy shyqty, merdigerge beriletin usynymdar talqylanyp jatyr. Soǵan sáıkes jóndeý jumystary men aıaqtaý merzimi anyqtalady, — dedi Gaýhar Orazova.
Osy aýylda elý jyl turatyn Nıkolaı Lozovskoı o basta mektep ǵımaratynyń orny durys tańdalmaǵanyn jetkizdi.
— Kóktemde sol jerlerdi sý basyp jatatyn. Tipti qustar kelip, úırek júzip júretin. Meniń oıymsha, sondaı jer bolǵannan keıin tireýishter qaǵylýy kerek edi. Sosyn topyraq tógilgenmen, tyǵyzdalmaǵan shyǵar. Basty sebebi, irgetasy durys bolmaǵan soń, ǵımarat shógip tur. Ótken jyly da, bıyl da jamap-jasqaǵanmen, ol osylaı bola beredi, — dedi Nıkolaı Lozovskoı.
Aqsýat aýyldyq okrýginiń ákimi Qaırat Ádilhanov saıdyń árirekte ekendigin, biraq mekteptiń sý jınalatyn jerde salynǵanyn rastady.
— Merdiger kompanııa irgetas úshin shuńqyr qazǵan kezde soǵan sý kirip ketken. Traktordyń sýdyń ortasynda turǵany jóninde turǵyndar beınejazba da jarııalady kezinde. Men ákim bolyp keıin keldim. Endi tehnıkalyq zertteý qorytyndysyna sáıkes aralyq qabyrǵalardy buzyp, qaıta salý jáne irgetasty nyǵaıtý qajet dep oılaımyn, — dedi Qaırat Ádilhanov.
Eske sala keteıik, budan buryn Oralda ashylýy tıis keleshek mektebi nege merziminde berilmeı qalǵanyn jazǵan edik.