BQO-da jańadan qus fabrıkasy salynýda

Qurylys barysymen keshe oblys ákimi Altaı Kólginov tanysty. Atalmysh nysanǵa bıyl «Bıznestiń jol kartasy - 2020» baǵdarlamasy aıasynda «Sberbank» AQ arqyly 1,7 mlrd. teńge bólingen. Bas merdigeri «Kerýen joly» JShS kúni búgin nysannyń irgetasyn quıýda. Munda 250 adam jumys jasaýda.

Qurylysqa tapsyrys bergen «Jaıyq Agro LTD" JShS-nyń basshysy Temirǵalı Eskendirovtiń sózine qaraǵanda, jumyrtqalar Gollandııadan jetkizilip, ınkýbatorda etti (broıler) balapandar ósiriledi.

Óńir basshysy bul joba eki jyldan beri oılastyrylǵanyn aıta kelip, qurylysty merziminde, bıylǵy jyl sońynda sapaly bitirýdi tapsyrdy.

Oblys ákimi Altaı Kólginov sondaı-aq Jańaqala aýdany ortalyǵynda boı kóterip jatqan 16 úı qurylysyna aıaldap, jergilikti halyqpen kezdesti. Aýdanda shilde aıynda bolǵan kezinde turǵyndar sý máselesin kótergen bolatyn. Olardyń tilegi eskerilip, sýarmaly jaıylmalardyń eskirgen qaqpalaryn jóndeýge 24 mln. teńge, Qarasý, Tórtqulaq jaıylmalarynyń jobalyq qujattaryn jasaýǵa 5 mln. teńge bólindi. Oǵan qosa Úkimet basshysynyń aldyna másele etip kóterý nátıjesinde Qulshyq qumynan Jańaqalaǵa jerasty sý qubyrlaryn  tartý jumysy qolǵa alyndy. 2015 jyly jobanyń tehnıkalyq-ekonomıkalyq negizdemesi daıyndalyp, 2016 jylǵa JSQ jasaqtaýǵa 28,766 mln. teńge qarjy bólinip, konkýrsy ótkizildi. Konkýrs nátıjesinde «SPS» JShS-men 58 490,460 myń teńgege kelisimshart jasaldy. Jobalaý jumystary bastaldy. Qurylys jumystary 2 801 mln. teńge qarjyny qajet etedi. Qurylys jumystaryn 2017-2018 jyldary júrgizý josparlanýda. Tartylatyn sý qubyrynyń uzyndyǵy - 151 km. Aýdannyń 8 eldi mekeni, ıaǵnı turǵyndardyń 70 paıyzy aýyz sýmen qamtylatyn bolady.

Aıta keteıik, óńir basshysy bul nysandarǵa shalǵaıdaǵy Bókeı ordasy aýdanyna bara jatqan jolda soqqan bolatyn. Ákim endi Bókeı ordasy aýdanynyń tynys-tirshiligimen tanysýda. Buǵan deıin Altaı Kólginov oblys ákimi bolyp taǵaıyndalǵannan beri basqa on bir aýdannyń bárine at basyn tiregen edi.