BQO-da jańa týǵan sábıin ájethanaǵa tastaǵan qyzǵa qatysty sot úkimi shyqty
ORAL. QazAqparat – Batys Qazaqstan oblysynda jańa týǵan sábıin paketke salyp, ájethanaǵa tastaǵan qyzǵa qatysty sot úkimi shyqty, dep habarlaıdy QazAqparat tilshisi.
Qaztalov aýdandyq №2 sotynyń úkimimen Oraldaǵy kolledjderdiń birinde oqıtyn, Jańajol aýylynda turatyn 19 jastaǵy qyz QR QK 100-babyna sáıkes aıypty dep tanylyp, onyń eki jylǵa bas bostandyǵy shekteldi.
Sot talqysynda anyqtalǵanyndaı, qyz ótken jyldyń qyrkúıek aıynda tanys jigitinen júkti bolyp qalǵanyn bilgen. Alaıda bul jóninde ata-anasy nemese basqa adamdarǵa aıtpaǵan. Sodan 23 qarasha kúni úıdiń senesinde tiri kúıinde er balany týǵan. Buǵan qobaljyp, qorqyp ketken ol sol jerde qaıshymen balanyń kindigin kesken. Sosyn shaqalaqty tsellofan qapqa salyp, qora ishindegi dárethanaǵa salyp jiberip, jańa týǵan sábıin óltirgen.
Sottalýshy óziniń kinásin tolyq moıyndady. Qyzdyń sózine qaraǵanda, kezdesip júrgen jigitine qarasha aıynda telefon arqyly júkti bolyp qalǵanyn jazyp jibergende, ol «bala kerek emes, ne isteseń, óziń bil» dep jaýap bergen. 23 qarasha kúni túski tamaqtan keıin anasy dúkenge ketken. Ákesi men eki baýyry óz bólmelerine kirip, demalyp jatyp qalǵan.
Sábıin týyp, dárethanaǵa tastaǵannan keıin úıge kirip, óz bólmesine baryp jatyp qalǵan. Alaıda anasy kelgennen keıin aýrýhanaǵa aparýyn ótingen. Aýrýhanada barlyq jaǵdaı belgili boldy.
Qyz qylmys jasaǵanyna ókinetinin bildirip, sottan qatań jazalamaýdy surady.
Saraptamaǵa sáıkes 8-8,5 aılyq sábı tiri týǵan.
Sot úkim taǵaıyndaǵan kezde sottalýshynyń kinásin tolyq moıyndaǵanyn, materıaldyq jáne otbasylyq jaǵdaıyn, buryn sottalmaǵanyn, jastyǵyn eskerdi.
BQO sotynyń baspasóz qyzmetinen túsken málimetke qaraǵanda, úkim zańdy kúshine engen joq.
Eske sala keteıik, oqıǵa byltyr qarasha aıynda Qaztalov aýdanynda bolǵan.
