BQO-da jańa sport keshenin satyp alý boıynsha konkýrs ótpeı qaldy
ORAL. KAZINFORM – Batys Qazaqstan oblysy Bókeı ordasy aýdany Han ordasy aýylyndaǵy «Naryn» sport keshenin satyp alý boıynsha konkýrstyń ótpeı qalǵany belgili boldy.
Osyǵan oraı Kazinform tilshisi konkýrstyń nelikten ótpegeni jóninde Bókeı ordasy aýdany ákimdigine arnaıy suraý salǵan edi.
Ákimdikten túsken málimetke qaraǵanda, Han ordasy aýyly – jyl saıyn 30 myńnan astam adam keletin Batys Qazaqstan oblysynyń tarıhı-týrıstik ortalyǵy, sondaı-aq 2,5 myńnan astam turǵyny bar Bókeı ordasy aýdanyndaǵy iri aýyldardyń biri.
Aýyl turǵyndary sportpen jáne dene shynyqtyrýmen belsendi túrde aınalysady. 100-den astam bala basketbol, voleıbol, fýtbol, kúres, aýyr atletıka, toǵyzqumalaq jáne boks sektsııalaryna qatysady.
Zamanaýı sport kesheniniń bolmaýyna baılanysty jattyǵýlar 1982 jyly salynǵan, qazirgi talaptarǵa sáıkes kelmeıtin beıimdelgen ǵımaratta ótkizilip keldi. Aýyl turǵyndary tarapynan zamanaýı sport zalyn salý qajettiligi týraly másele birneshe ret kóterilgen bolatyn. Jeke ınvestorlarmen júrgizilgen kelissózderdiń nátıjesinde 2025 jyly Han ordasy aýylynda jeke kásipker «Abdýhatov E.A.» óz qarajaty esebinen sport keshenin salyp, jyl sońynda paıdalanýǵa berdi.
Qazirgi ýaqytta aýyl turǵyndarynyń ótinishi boıynsha jáne kásipkerdiń kelisimimen keshende balalarǵa arnalǵan jattyǵýlar men túrli sporttyq is-sharalar ótkizilýde. Ǵımaratty kútip-ustaý jáne qyzmet kórsetý shyǵyndaryn kásipker ózi kóterip otyr.
Halyqty qajetti sporttyq ınfraqurylymmen qamtamasyz etý, sondaı-aq balalarǵa arnalǵan tegin úıirmeler men sport sektsııalaryn uıymdastyrý maqsatynda sport nysanyn satyp alý boıynsha konkýrs ótkizý týraly sheshim qabyldandy.
Áleýmettik nysandardy memlekettik-jekeshelik áriptestik tetigi arqyly jáne jeke ınvestıtsııalardy tartý esebinen salý bıýdjet qarajatyn únemdeýge, ýaqytty tıimdi paıdalanýǵa jáne halyq kóterip otyrǵan ózekti máselelerdi sheshýge múmkindik beredi.
– Osyǵan baılanysty 2026 jylǵy 10 aqpanda sport keshenin satyp alý boıynsha ashyq konkýrs jarııalandy. Ótinimderdi qabyldaý merzimi – 2026 jylǵy 17 aqpanǵa deıin. Tapsyrys berýshi – «Bókeı ordasy aýdany mádenıet, tilderdi damytý, dene shynyqtyrý jáne sport bóliminiń «Orda» sport klýby» KMM. Áleýetti jetkizýshilerden ótinimderdiń túspeýine baılanysty konkýrs ótpedi. Aldaǵy ýaqytta sport keshenin satyp alý boıynsha konkýrs jarııalanatyn bolady, - delingen resmı jaýapta.
Atalǵan nysandy saltanatty ashylý rásimi 2025 jylǵy 24 jeltoqsanda ótken edi.
Eske sala keteıik, budan buryn Oral qalasynda jańa stadıon salyna ma, sol týraly jazǵan edik.