BQO-da jańa mektep paıdalanýǵa berildi
ORAL. KAZINFORM – Batys Qazaqstan oblysynyń ákimi Narıman Tóreǵalıev Qaratóbe aýdanyna jumys sapary aıasynda Sáýle aýylynda salynǵan jańa shaǵyn jınaqty bilim ordasynyń ashylý rásimine qatysty. Aımaq basshysy eldi meken turǵyndaryn aıtýly qýanyshpen quttyqtap, Jaqsybaı negizgi orta mektebiniń sý jańa ǵımaraty jas urpaqqa beriletin bilim sapasyn jańa deńgeıge kóteretinine senim bildirdi.
— Keıingi 3 jylda óńirde 30 mektep jańadan salyndy. Bıyl kezekti oqý jylynda osyndaı taǵy 7 shaǵyn jınaqty mektepti paıdalanýǵa bergeli otyrmyz. Bilim berý ınfraqurylymyn damytý, qala men aýyl mektepterindegi bilim sapasyndaǵy alshaqtyqty azaıtý — Memleket basshysy Qasym-Jomart Kemeluly Toqaevtyń naqty tapsyrmasy. Bul jóninde Prezıdent kúni keshe ótken Tamyz konferentsııasynyń plenarlyq otyrysynda da aıtty. Jas urpaqtyń alańsyz bilim alýy úshin jaǵdaı jasaý — memlekettiń strategııalyq mindeti, — dedi Narıman Tóreǵalıev.
Oblys ákimi el tarıhyndaǵy tuńǵysh Quryltaı saılaýyna belsene qatysyp, azamattyq jaýapkershilik tanytqany úshin aýyl turǵyndaryna rızashylyǵyn jetkizdi. Áleýmettik nysandy ýaqytyly ári sapaly salyp bergen qurylysshylarǵa alǵys hat tabys etti.
Jaqsybaı negizgi mektebi 1973 jyly bastaýysh mektep retinde ashylyp, 1991 jyly mártebesi aýysqan. Jarty ǵasyrdan astam ýaqyt paıdalanylǵan ǵımarattyń tozyǵy jetti. 60 orynǵa shaqtalǵan sý jańa nysan KPO b.v. kompanııasynyń áleýmettik mindettemeleri aıasynda boı kóterdi.
Jańa ǵımaratta 10 oqý kabıneti bar. Sondaı-aq, 2 sheberhana, kitaphana, ashana, májilis jáne sport zaldarymen qamtamasyz etilgen. Balalar qaýipsizdigi úshin 62 beınebaqylaý kamerasy men kireberiske týrnıket qoıylǵan. Mektep aýlasy tolyq abattandyrylǵan. Sport jáne balalar oıyn alańdary jasaqtalǵan.
Saltanatty is-sharaǵa qatysqan aýyl turǵyndary ıgilikti iske dán rıza ekenin aıtyp, memleket qoldaýy úshin alǵys bildirdi.
Aıta keteıik, jańa oqý jylynda negizgi mektepte 69 oqýshy bilim alady. Olarǵa 29 pedagog sabaq beredi.
