BQO-da jańa medıtsınalyq pýnkt paıdalanýǵa berildi
ORAL. KAZINFORM – Batys Qazaqstan oblysy Bórli aýdanynyń Oblavka aýylynda jańa medıtsınalyq pýnkt paıdalanýǵa berildi. «Aýylda densaýlyq saqtaýdy jańǵyrtý» baǵdarlamasy aıasynda júzege asyrylyp jatqan jobanyń quny 160 mln teńgeni quraıdy.
Tapsyrys berýshi – Batys Qazaqstan oblysynyń densaýlyq saqtaý basqarmasy. Qurylys-montaj jumystary 2024 jyldyń qyrkúıek aıynda bastaldy. Atalǵan medıtsınalyq pýkttiń merdigeri – «Ýralskstroıınvest» JShS.
Buǵan deıin medıtsınalyq pýnkt ótken ǵasyrdyń ortasynda salynǵan ǵımaratta ornalasqan bolatyn. Qazirgi jańa ǵımarattyń aýdany – 155 sh.m.
Ǵımaratta dárigerge deıingi, protsedýralyq, fızıoterapııalyq kabınetter, medbıkeniń qabyldaý bólmesi jáne tehnıkalyq úı-jaılar bar. Medıtsınalyq pýnkt óz deńgeıine qajetti qural-jabdyqtarmen jabdyqtalǵan. Shtatta medbıke, tehnıkalyq qyzmetker, kúzetshi jáne eki qazandyq operatory bar.
Medbıke Gúlnar Temergalıevanyń jalpy eńbek ótili 39 jyl bolsa, onyń 35 jylyn Oblavkada jumys istegen.
– Aýylymyzda eresek turǵyndar sany 228 adamdy quraıdy. Bir jasqa deıingi 2 bala, 14 jasqa deıingi 48 bala bar. Qazirgi ýaqytta esepte turǵan júkti áıelder joq. Medıtsınalyq pýnktte biz qabyldaýlardy, tekserýlerdi jáne fýnktsıonaldyq mindetterimizge kiretin protsedýralardy júrgizemiz, - dep bólisti Gúlnar Temergalıeva.
Ashylý saltanatynda Bórli aýdany ákiminiń orynbasary Muqtar Nurmaqov sóz sóıledi.
– Aýyl turǵyndaryn Táýelsizdik kúnimen jáne kópten kútken oqıǵa – jańa medıtsınalyq pýnkttiń paıdalanýǵa berilýimen quttyqtaımyn. Jańa nysan turǵyndar ıgiligine jumys istesin. Barshamyzǵa baqyt, sáttilik jáne aspanymyz tynysh bolsyn, - dedi aýdan basshysynyń orynbasary.
Oblavka aýyly turǵyndary atynan Meıram Tataev sóz sóılep, zamanaýı apparattarmen jabdyqtalǵan jańa ǵımarat úshin rızashylyqtaryn bildirdi.