BQO-da jańa gazdy keshendi daıyndaý qondyrǵysyn iske qosý kózdelýde
ORAL. QazAqparat - «Jaıyqmunaı» JShS Chınarev kenishinde jyl aıaǵyna deıin gazdy keshendi daıyndaý qondyrǵysyn iske qosýdy kózdep otyr, dep habarlaıdy «QazAqparat» HAA tilshisi.
Kompanııanyń bas dırektory Jomart Darkeevtiń aıtýynsha, №3 gazdy keshendi daıyndaý qondyrǵysy qurylysy budan eki jyl buryn qolǵa alynǵan bolatyn. Bıyl jazdan bastap iske qosý-retteý jumystary júrgiziledi. Jańa qondyrǵy gaz daıyndaý kólemin jylyna 2,5 mlrd. tekshe metrge arttyrýǵa múmkindik beredi. Sonda jalpy mólsheri 3,7-3,8 mlrd. tekshe metrge jetetin bolady. Osylaısha oblystyń gazdy syrttan ákelýge táýeldiligi edáýir kemıtin bolady. Jańa qondyrǵydaǵy negizgi ónim túri - tabıǵı gaz. Oǵan qosa munaı, kondensat, suıytylǵan gaz óndiriledi. Qazirgi tańda barlyq óndiriletin tabıǵı gaz (1,2 mlrd. tekshe metr) elimizdiń ishki naryǵyna jóneltiledi. Endi gazdyń jańa kólemi men munaıdyń 15 paıyzy kelisim-shart boıynsha ishki naryqta qalatyn bolady. Kondensat Eýropa elderine shyǵarylady. Óńirde qalatyn 2300 tonna suıytylǵan gazdyń 800 tonnasy jeńildetilgen baǵamen bosatylady.
«Jańa nysanda jumys jasaıtyn 80 adamdy kásiporyn ózi oqytady. Álemdegi munaı naryǵyndaǵy jaǵdaıdyń turaqsyz bolýyna qaramastan, «Jaıyqmunaı» JShS ónim kólemin tómendetpeı, qaıta ósirýge baǵyt ustap, bıylǵy jyl mindettemelerin oryndaýdy josparlap otyr», dedi J.Darkeev.
