BQO-da jańa dene shynyqtyrý-saýyqtyrý kesheni nelikten talapqa saı emes — ákimdik jaýap berdi
ORAL. KAZINFORM — Batys Qazaqstan oblysy Báıterek aýdany Darııan aýylynda jańadan boı kótergen dene shynyqtyrý-saýyqtyrý kesheni talapqa saı kelmeı tur.
Qoǵam belsendisi Almagúl Iqsanovanyń málim etkenindeı, atalmysh nysan ótken jyldyń sońynda «Qarashyǵanaq Petrolıým Opereıtıng B.V.» kompanııasynyń áleýmettik mindettemeleri esebinen saltanatty túrde ashylǵan. Buǵan 11,1 mlrd teńge qarjy jumsalǵan.
— Osyndaı qarjyǵa salynǵannan keıin dene shynyqtyrý-saýyqtyrý kesheni talapqa saı bolýy kerek qoı. Birinshiden, doptar joq. Onyń bireýi 60 myń teńge turady, al munda bazardan ákelingen 3 myń teńgeniń doby tur. Ekinshiden, sapasyz trenajerlik jabdyq qoıylǵan. Gımnastıkalyq jabdyq ta qazir joq. Qabyrǵalar yryq-jyryq. Qolǵaptar da eski-qusqy. Týrnıketti tot basqan. Syrttaǵy septıkti de retke keltirý kerek, — deıdi A.Iqsanova.
Onyń aıtýynsha, jergilikti jasóspirimder halyqaralyq jarystarda júlde alyp júrgenimen, jattyǵýlaryna jaǵdaı jasalmaǵan.
— Ózim osy jerde týyp-óskennen keıin meniń de janym aýyrady. Qazirge deıin nysan jabyq tur, balalar jattyǵa almaı júr. Shyn mánisinde «Qarashyǵanaq Petrolıým Opereıtıng B.V.» kompanııasy atalmysh nysannyń tapsyrylǵany jóninde óz paraqshasynda 30 jeltoqsanda aqparat jarııalady. Sonda ony kim qabyldap alǵan? Men kompanııanyń ózine de baryp, talap qoıamyn, — dep qosty qoǵam belsendisi.
Osyǵan oraı Kazinform tilshisi Báıterek aýdany ákimdigine arnaıy saýal joldaǵan edi.
Ákimdik málimetine qaraǵanda, atalǵan keshenniń tapsyrys berýshisi «Qarashyǵanaq Petrolıým Opereıtıng B.V.» kompanııasy bolsa, merdiger uıym — «Energostroı» JShS.
Kúni búgin nysan qurylysy aıaqtalǵan, biraq Báıterek aýdany teńgerimine berilmegen. Atalǵan nysan boıynsha birqatar eskertpe bar, merdiger uıym sony joıý jumystaryn júrgizýde.
— Qazirgi tańda ǵımarat pen dene shynyqtyrý-saýyqtyrý kesheni aýmaǵyn retke keltirý úshin qurylys kompanııasy sylaý jumystaryn atqarýda. Atap aıtqanda, trenajer, kúres zaldarynda, dálizde sylaý-boıaý, jóndeý jumystary júrgizildi. Keshen aýmaǵy tazalanǵannan keıin qurylys qaldyqtary shyǵarylady. Sporttyq qural-jabdyqtar merdiger uıymmen jobaǵa, tehnıkalyq talaptarǵa sáıkes satyp alynǵan. Qosymsha qural-jabdyqtardy sportshylardyń ózderi ákelgen. Sonymen qatar atalmysh nysan boıynsha kepildik mindettemeler bar, ol QR zańnamasyna sáıkes oryndalatyn bolady, — delingen resmı jaýapta.
Eske sala keteıik, budan buryn BQO-da jańadan salynǵan mektep ǵımaraty eki jyl ótpeı nelikten jabylǵanyn jazǵan bolatynbyz.
