BQO-da jalǵan markamen ishimdik satqysy kelgen kásiporyn dırektorynyń orynbasary sottaldy
ORAL. QazAqparat – Batys Qazaqstan oblysynda jalǵan markamen ishimdik satqysy kelgen kásiporyn dırektorynyń orynbasary sottaldy, dep habarlaıdy QazAqparat tilshisi.
QR Qarjy mınıstrligi Qarjy monıtorıngi komıtetiniń baspasóz qyzmetinen túsken málimetke qaraǵanda, BQO boıynsha ekonomıkalyq tergeý departamenti jalǵan esep-baqylaý markalary bar alkogol ónimderin zańsyz satýdyń jolyn kesti.
«AGISA-3» JShS dırektorynyń logıstıka jónindegi orynbasary ótken jyldyń shilde aıynda «Maksımýs» JShS shyǵarǵan jalpy somasy 6 mln teńgege jalǵan esep-baqylaý markalary bar 33 myń bótelke túrli alkogol ónimin satyp alǵan. Sodan keıin ol osy alkogol ónimin Oral men Aqsaı qalalarynyń túrli saýda oryndaryna satqan. Osylaısha «Etıl spırti men alkogol óniminiń óndirilý jáne aınalymyn memlekettik retteý týraly» QR Zańy men QR Salyq kodeksiniń talaptaryn buzdy.
Jedel izdestirý sharalary barysynda atalǵan departament qyzmetkerleri Oral men Aqsaı qalalarynyń birqatar kásiporyndary men dúkenderiniń qoımalaryn teksergen kezde jalǵan markalary bar 32615 bótelke ishimdik tabyldy.
Oral qalalyq sotynyń úkimimen kásiporyn dırektorynyń orynbasary QR QK 233-baby 2-bóligine sáıkes aıypty dep tanylyp, bir jyl boıy kásipkerlik qyzmet jasaý quqyǵynan aıyrýmen birge onyń 1 jylǵa bas bostandyǵy shekteldi.
Eske sala keteıik, budan buryn Oralda qarjy pıramıdasyn qurǵan zergerlik salon anyqtalǵanyn jazǵan bolatynbyz.
