BQO-da jalǵan málimet berip, 1,6 mln teńgeni qaltaǵa basqan qojalyq basshysy sottaldy
ORAL. QazAqparat - Batys Qazaqstan oblysynda jalǵan málimet berip, 1,6 mln teńge demeýqarjyny qaltaǵa basqan qojalyq basshysy sottaldy, dep habarlaıdy QazAqparat tilshisi.
BQO sotynyń baspasóz qyzmetinen túsken málimetke qaraǵanda, Zelenov aýdanynda egin ósirýmen aınalysatyn sharýa qojalyǵynyń S. degen basshysy QR QK 190-baby 3-bóligi 1-tarmaǵyna sáıkes qylmystyq jaýapkershilikke tartyldy.
Ol aýyl sharýashylyǵy bólimine 200 gektar alqapqa sýdan shóbin ektim dep, qujattaryn ótkizgen. Shyn mánisinde 31 gektarǵa sýdan shóbi egilgen.
Oblystyq aýyl sharýashylyǵy basqarmasy ósimdik sharýashylyǵy ónimderin kóbeıtý jáne sapasyn arttyrýdy demeýqarjylandyrý baǵdarlamasyna sáıkes osy jalǵan derekter negizinde atalǵan qojalyqtyń esepshotyna 1,6 mln teńge aýdarǵan. Ony S. óz qalaýynsha jaratqan.
Sot talqysynda sottalýshy sotqa deıingi bergen jaýaptaryn, sondaı-aq jasalǵan protsessýaldyq kelisimdi moıyndady.
Zelenov aýdandyq sotynyń úkimimen S. QR QK 190-baby 3-bóligi 1-tarmaǵyna sáıkes aıypty dep tanylyp, ol múlkin tárkileýsiz, shartty túrde 3 jylǵa bas bostandyǵynan aıyrý jazasyna kesildi.
