BQO-da jalǵan qujatpen Reseıge taýar áketpek bolǵan 7 júk kóligi ustaldy
ORAL. QazAqparat – Batys Qazaqstan oblysynda jalǵan qujatpen Reseıge halyq tutynatyn taýarlar áketpek bolǵan 7 júk kóligi ustaldy, dep habarlaıdy QazAqparat tilshisi.
BQO memlekettik kirister departamentinen alynǵan málimetke qaraǵanda, atalǵan avtokólikter «Syrym» avtomobıl ótkizý beketinde 1-15 maýsym aralyǵynda toqtatylǵan.
Departamenttiń eksporttyq baqylaý qyzmetkerleri teksergen kezde usynylǵan elektrondy shot-faktýralardyń elektrondy shot-faktýralar aqparattyq júıesinde joqtyǵy anyqtaldy. Bul derekter júk jóneltýshiniń naqty alynǵan tabystardy jasyrý jáne salyq tóleýden jaltarý maqsatynda qoldan jasalǵan qujattardy jazyp berý nıetiniń bolǵandyǵyn kórsetedi.
Aldyn ala málimet boıynsha taýardyń jalpy quny 16 mln rýblden astam nemese 92,6 mln teńgeni qurady.
Atalǵan derek boıynsha materıaldar QR zańnamasyna sáıkes protsessýaldyq sheshim qabyldaý úshin BQO boıynsha ekonomıkalyq tergeý departamentine berildi.
Aıta keteıik, osyndaı derekter mamyr aıynda da belgili bolǵan edi. «Syrym» avtomobıl ótkizý beketinde júktiń jalpy quny 1 mlrd teńgeden asatyn jalǵan shot-faktýralary bar 14 júk kóligi ustalǵan edi.
