BQO-da jalǵan qyzmet kórsetken 17 kásiporynnyń aqsha aınalymy 2 mlrd teńgeden asqan

ORAL. KAZINFORM – Batys Qazaqstan oblysynda jumysty naqty oryndamaı, túrli kásiporyndarǵa taýar jóneltpesten, jalǵan shot-faktýralar jazýmen aınalysqan adamdar tobynyń qyzmeti áshkerelenip, toqtatyldy.

Batys Qazaqstan oblysy boıynsha ekonomıkalyq tergep-tekserý departamentiniń baspasóz qyzmetinen málim etkenindeı, Oral qalasynyń turǵyny buryn osyǵan uqsas qylmysy úshin sottalǵanyna qaramastan, 2022–2025 jyldar aralyǵynda jalǵan shot-faktýra jazý áreketin jalǵastyrǵan.

Ol óziniń baqylaýyndaǵylardy, sonyń ishinde adamgershilikke jat ómir saltyn ustanatyn adamdardy qylmystyq áreketke tartyp otyrǵan.

Kúdiktilermen barlyǵy 17 kásiporyn tirkelip, jazylǵan shot-faktýralar boıynsha aqsha aınalymy 2,0 mlrd teńgeden asqan. Bul kásiporyndar qurylys, arnaıy tehnıkany jalǵa berý jáne taýar-materıaldyq qundylyqtardy jetkizý salasynda jalǵan qyzmet kórsetýmen aınalysqan. Alaıda kásiporyndardyń qajetti qyzmetkerleri, negizgi quraldary men arnaıy tehnıkasy bolmaǵan. Qyzmet etken kezeńde nebári 2,3 mln teńge salyq tólengen.

- Osylaısha, uıymdastyrýshy kórsetken qyzmeti úshin zańsyz syıaqy retinde aınalymdaǵy aqshalaı qarajat somasynyń 7 paıyzyn alyp otyrǵan. Qazir sotqa deıingi tergeý amaldary júrgizilip jatyr. Qylmys uıymdastyrýshysy úıqamaqta otyr. QR Qylmystyq is júrgizý kodeksiniń 201-babyna sáıkes ózge aqparat tergeý múddesine oraı jarııalaýǵa jatpaıdy, - dep habarlady vedomstvodan.

Eske sala keteıik, budan buryn BQO-da qarjylyq pıramıdalardan 1 myńnan astam turǵynnyń zardap shekkenin jazǵan edik.