BQO-da jaldaý aqysyn tólemegen kásipkerlerden 9,5 mln teńge óndirildi
ORAL. KAZINFORM — Batys Qazaqstan oblysynda bıylǵy on aıda 340 múliktik jaldaý sharty jasalyp, jaldaý aqysynan oblystyq bıýdjetke 217,7 mln teńge tústi.
BQO memlekettik satyp alý jáne kommýnaldyq menshik basqarmasynyń basshysy Ádiljan Ǵubashevtiń óńirlik kommýnıkatsııalar qyzmeti alańynda ótken brıfıngte málim etkenindeı, bul 2025 jyldyń osy kezeńimen salystyrǵanda, 42,5 paıyz kóp.
Ádiljan Isataıulynyń sózine qaraǵanda, byltyr on aıda 379 shart boıynsha 152,8 mln teńge bıýdjetke aýdarylǵan edi.
— Basqarma jaldaý sharttaryn jasasýdan bas tartqan jáne jaldaý aqysyn tólemegenderge qatysty tıisti shara qabyldap, sot arqyly 9,5 mln teńge kólemindegi bereshekti óndirdi. Atap aıtqanda, Oral qalasyndaǵy № 33 orta mektep boıynsha jeke kásipkerden 0,3 mln teńge óndirildi. Qazirgi ýaqytta jaldaý aqysy aı saıyn tólenýde. Sol sekildi Terekti aýdanynda Podstepnoe № 2 orta mektebi boıynsha sot tártibimen taǵy bir jeke kásipker 9,2 mln teńgeni tóleýge májbúr boldy, — dedi Á.Ǵubashev.
Onyń aıtýynsha, sondaı-aq jasalǵan jaldaý sharttaryndaǵy tólemderdi ýaqtyly tólemeý faktilerine qatysty da QR Ákimshilik quqyq buzýshylyq týraly kodeksiniń 205-babyna sáıkes ákimshilik jaýaptylyq kózdelgen.
Jyl basynan beri atalmysh kodekstiń 205-babyn qoldaný aıasynda oblys ákiminiń apparatyna tıisti sheshimder qabyldaý úshin joldaý maqsatynda 122 ákimshilik materıaldy daıyndaý jáne qaraý boıynsha aýqymdy jumys júrgizildi.
Basqarma málimetine sáıkes oblysta 1221 uıym bolsa, sonyń 882-si — memlekettik jáne memlekettik kommýnaldyq mekemeler, 339-y — kvazımemlekettik sektor sýbektileri (AQ, JShS, memlekettik kommýnaldyq kásiporyn, memlekettik kommýnaldyq-qazynalyq kásiporyn). 866 uıym áleýmettik (bilim berý, densaýlyq saqtaý, sport, mádenıet, áleýmettik qamsyzdandyrý), qalǵan 355-i muraǵat, tabıǵı resýrstar jáne tabıǵatty paıdalaný, ishki jáne jastar saıasaty, TÚKSh, din jáne basqa salalarda jumys isteıdi.
Oblysta 2025 jylǵy qyzmetiniń qorytyndysy boıynsha 44 uıymnan (43-i — memlekettik kásiporyn, bireýi — JShS) 142,2 mln teńge taza kiris bóligi oblystyq bıýdjetke aýdaryldy.
Eske sala keteıik, budan buryn BQO-da sot arqyly jumysyna qaıta ornalasqan qutqarýshy 2,3 mln teńge óndirgenin jazǵan edik.