BQO-da zeınetker «polıtseıge» aldanyp, 0,5 mln teńgesinen aıyryldy
ORAL. QazAqparat – Batys Qazaqstan oblysynda zeınetker alaıaqqa aldanyp, jarty mln teńgesinen aıyryldy, dep habarlaıdy QazAqparat tilshisi.
BQO Polıtsııa departamentiniń baspasóz qyzmetinen túsken málimetke qaraǵanda, oqıǵa 14 qańtar kúni Aqjaıyq aýdanynda boldy.
Osy aýdannyń 1947 jylǵy turǵynyna belgisiz bireý telefon shalyp, ózin polıtsııa qyzmetkeri retinde tanystyrǵan. Sodan keıin nemeresiniń esirtkimen ustalǵanyn aıtyp, ony bosatý úshin 500 myń teńge talap etken.
Buǵan senip qalǵan aýyl turǵyny alaıaq aıtqan abonenttik nómirge termınal arqyly atalǵan qarjyny aýdaryp jibergen.
Bir saǵattan keıin aldanǵan turǵyn polıtsııaǵa júgingen.
Bul oqıǵa boıynsha QR QK 190-babyna sáıkes (alaıaqtyq) tergeý amaldary júrgizilýde.
Krımınaldyq polıtsııa basqarmasy qyzmetkerleriniń aıtýynsha, mundaı oqıǵalar 2015-2016 jyldary jıi oryn aldy. 2017-2018 jyldary alaıaqtyqtyń bul túri kezdese qoıǵan joq. Al ótken jyldyń jeltoqsanynda eki birdeı derek tirkeldi. Atap aıtqanda, Qaratóbe aýdanynyń bir turǵyny 520 myń teńgege, ekinshisi 20 myń teńgege aldanǵan.
Bıyl osyndaı aryzben Shyńǵyrlaý aýdanynyń eki turǵyny polıtsııaǵa keldi. Munda jábirlenýshiniń biri alaıaqtarǵa 1,2 mln teńge, ekinshisi 300 myń teńge aýdaryp jibergen.
Osylaısha oblysta jyl basynan beri mundaı qylmystyń úsh deregi tirkelip otyr.
