BQO-da zańsyz qyzmet atqarǵan dinı uıym anyqtaldy

ORAL. QazAqparat - BQO ishki ister departamenti óńirdegi dinı ahýalǵa monıtorıng júrgizgen kezde baptısterdiń zańsyz qyzmet atqarǵany anyqtaldy, dep habarlaıdy «QazAqparat» HAA tilshisi.

Atalmysh departamenttiń baspasóz qyzmetinen túsken málimetke qaraǵanda, 5 aqpan kúni Oral qalasy Kókshetaý kóshesi 5-mekenjaı boıynsha ádilet organdarynda tirkelmegen «Evangelıe hrıstıan baptısteri» dinı uıymy ókilderiniń zańsyz jumysy belgili boldy.

Atalǵan derek boıynsha ishki ister departamenti qyzmetkerleri QR Ákimshilik quqyqbuzýshylyq kodeksi 489-baby 9-bólimine sáıkes 8 ákimshilik is qozǵady. Soǵan sáıkes atalǵan dinı uıymǵa 50 AEK-ten 100 AEK-ke deıingi kólemde (113450 teńgeden 226900 teńgege deıin) aıyppul salynýy múmkin.

Sol sekildi aldyn alý sharalary barysynda 26 aqpan kúni Tasqala aýdany ortalyǵy Tasqala aýylynda Skorobogatov kóshesi 61-mekenjaıynda tirkelmegen «Evangelıe hrıstıan baptısteri» dinı uıymy eki ókiliniń zańsyz dinı qyzmet atqarǵany áshkerelendi. Atalǵan adamdarǵa qatysty QR Ákimshilik quqyqbuzýshylyq kodeksi 489-baby 10-bólimine sáıkes ákimshilik is qozǵaldy.