BQO-da zańsyz kıik aýlaýmen aınalysqan turǵyndar ustaldy
ORAL. QazAqparat - Polıtsııa qyzmetkerleri «Ohotzooprom» ÓB» RMQK ınspektorlarymen birge zańsyz kıik aýlaǵan turǵyndardy ustady, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, eki oqıǵa da Jánibek aýdanynda oryn aldy.
23 maýsym kúni saǵat 10.30 shamasynda Aqoba aýyldyq okrýgine qarasty «Máńgúr» men «Dostyq» qystaqtarynyń arasynda Adaıbaı sý qoımasy mańynan 4 kıiktiń ushasy tabyldy.
Jedel izdestirý sharalary barysynda osyǵan kúdikti retinde aýdannyń 1991 jáne 1979 jylǵy turǵyndary anyqtalyp, qolǵa tústi.
Oqıǵa ornynan 12-kalıbrlik «IJ-54» qos uńǵyly ańshy myltyǵy, 5 oq-dári, eki velosıped tárkilendi.
Sondaı-aq 25 maýsym kúni saǵat 11.00 shamasynda Kúıgenkól aýyldyq okrýgine qarasty «Astaý salǵan» qystaǵy mańynda 1973 jylǵy turǵyn ustaldy. Onyń mototsıklinen kıiktiń eki ushasy, 4 múıizi, pyshaq, 12-kalıbrlik qos uńǵyly ańshy myltyǵy jáne bes oq-dári alyndy.
Qazirgi kezde atalǵan oqıǵalar boıynsha QR QK 337-baby 4-bóligine (zańsyz ańshylyq) jáne 339-babyna (ósimdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý) sáıkes qylmystyq ister qozǵalyp, tergeý amaldary júrgizilýde.
Sonymen qatar saraptamalar taǵaıyndaldy.
Eske sala keteıik, budan buryn oraldyq turǵynnyń 2 kg marıhýanany páterinde saqtaǵanyn jazǵan bolatynbyz.
