BQO-da zańsyz kıik aýlaǵan qylmystyq topqa qatysty is sotqa berildi
ORAL. QazAqparat - Oblys aýmaǵynda uzaq ýaqyt boıy zańsyz kıik aýlaýmen aınalysqan uıymdasqan qylmystyq topqa qatysty is sotqa berildi, dep habarlaıdy «QazAqparat» tilshisi.
BQO prokýratýrasynyń baspasóz qyzmetinen túsken málimetke qaraǵanda, quramynda alty adam bolǵan topqa «Ohotzooprom» ÓB» RMQK qyzmetkeri basshylyq etken. Ol jalpy qamqorshylyq jasap, toptyń qyzmetin úılestirip otyrǵan.
Oǵan qosa kıik múıizin satýmen aınalysqan taǵy eki adam ustaldy.
Barlyǵy zańsyz kıik aýlaýdyń 11 deregi dálelin tapty. Memleketke 745 mln teńge zalal keltirilgen.
Aıyptalýshylardyń mekenjaıyn tintken kezde kıiktiń 288 múıizi, 10 tehnıka (6 djıp, 4 qarshana), 5 ańshy myltyǵy, 3,630 mln teńge, elektrondy tarazylar, kıiktiń qany men múıiziniń bólikteriniń izi qalǵan pyshaqtar men qolaralar tárkilendi.
Eske sala keteıik, zańsyz kıik aýlaýmen aınalysqan atalmysh top bıylǵy 19 maýsymda Qaztalov aýdanynda qolǵa túsken bolatyn.
