BQO-da zańsyz ornatylǵan «Ustaz jáne oqýshylar» eskertkishi alynyp tastaldy
ORAL. KAZINFORM – Batys Qazaqstan oblysy Bókeı ordasy aýdany ortalyǵy Saıqyn aýylynda ornatylǵan «Ustaz jáne oqýshylar» eskertkishi alynyp tastaldy.
BQO mádenıet, tilderdi damytý jáne arhıv isi basqarmasy basshysynyń mindetin atqarýshy Qýanyshbek Muhanǵalıevtiń málim etkenindeı, atalmysh eskertkish 2020 jyly Saıqyn aýylynda M.Mámetova atyndaǵy mektep túlekteriniń demeýshiligimen 1,4 mln teńgege ornatylǵan.
Onyń sózine qaraǵanda, oblystyq mádenıet, tilderdi damytý jáne arhıv isi basqarmasy tarapynan aýdan ákimdikterine oblys aýmaǵynda eskertkishterdi zańsyz ornatýdyń aldyn alý týraly birneshe ret eskertpe hat joldanyp, jınalystarda eskertilgen.
QR Prezıdenti Ákimshiligi basshysynyń 2023 jylǵy 28 sáýirdegi №23-32-28.193 tapsyrmasyn oryndaý maqsatynda QR Mádenıet jáne aqparat mınıstrligi zańsyz ornatylǵan eskertkishterge monıtorıng júrgizý, túpkilikti sheshim shyǵarý (qaldyrý, túzetý ne buzý) maqsatynda jumystar júrgizdi.
Ótken jyldyń 12-13 jeltoqsan kúnderi oblysqa respýblıkalyq komıssııanyń jumys toby (S.Smaǵulov, B.Álibaı, R.Ábenov) issaparmen arnaıy kelip, Terekti jáne Bókeı ordasy aýdandaryna shyǵyp, zańsyz ornatylǵan eskertkishterdiń máselesin, sonyń ishinde «Ustaz jáne oqýshylar» eskertkishin qarady.
«Komıssııanyń hattamasyna sáıkes «Ustaz jáne oqýshylar» eskertkishiniń kórkemdik turǵydan tómen deńgeıde oryndalǵany, proportsııalyq ólshemderdiń saqtalmaǵany anyqtalyp, Bókeı ordasy aýdanynyń ákimdigine demontaj jumystaryn júrgizý usynyldy. Bıylǵy 14 mamyr kúni aýdan ákimdigi respýblıkalyq komıssııanyń hattamasyn oryndaý, sondaı-aq atalǵan eskertkishtiń kelbetin estetıkalyq-kórkemdik talaptarǵa jáne proportsııalyq ólshemderin sáıkestendirý maqsatynda demontaj jumystaryn júrgizdi. Aldaǵy ýaqytta atalǵan usynymdar tolyq oryndalǵan jaǵdaıda atalǵan eskertkishti zańnama aıasynda qaıta ornatý múmkindigi qarastyrylatyn bolady», - deıdi Q.Muhanǵalıev.
Onyń aıtýynsha, elimizde monýmenttik óner qurylystaryn ornatý QR Mádenıet jáne sport mınıstriniń 2020 jylǵy 28 sáýirdegi №103 buıryǵyna sáıkes júzege asyrylady. Aldymen jeke jáne zańdy tulǵalardyń ıdeıalyq usynystary BQO ákimdigi janyndaǵy oblystyq tarıh jáne mádenıet eskertkishterin qorǵaý jónindegi komıssııada qaralyp, keıin mınıstrlikke joldanady.
QR Mádenıet jáne aqparat mınıstrligi janyndaǵy monýmenttik óner qurylystaryn ornatý jónindegi respýblıkalyq komıssııada (budan ári - Komıssııa) saraptalyp, resmı ornatýǵa usynylady. Eń bastysy, eskertkish joǵary ıdeıalyq jáne kórkemdik talaptarǵa saı kelýi kerek.
«Bókeı ordasynda zańǵa sáıkes kelmeıtin osyndaı taǵy úsh jáne Terekti aýdanynda eki eskertkish bar. Olar da retke keltiriletin bolady. Qalǵan jerlerde biz zańǵa sáıkestendirdik. Eń aldymen eskertkishterdiń estetıkalyq kelbetin durystaý kerek. Bul jerde mynany túsingen jón, aýdandyq ákimdik bar, jeke tulǵalar, sol mekteptiń túlekteri bar, ortaq sheshimge kelip, bárin rettese, komıssııada qarap, qaıta ornatýǵa bolady», - dedi Kazinform tilshisine Q.Muhanǵalıev.
