BQO-da zańsyz mıkrokarjylyq uıym 4 jyl boıy jasyryn jumys istegen
ORAL. KAZINFORM - Batys Qazaqstan oblysynyń Oral qalalyq soty «Avans 07» JShS-niń basshysyna qatysty tıisti lıtsenzııasyz zańsyz mıkrokarjylyq qyzmetti júzege asyrý faktisi boıynsha úkim shyǵardy.
BQO boıynsha Ekonomıkalyq qylmystardy tergep-tekserý departamenti baspasóz qyzmetiniń habarlaýynsha, tergeýdi Batys Qazaqstan oblysy boıynsha Qarjylyq monıtorıng agenttiginiń departamenti júrgizdi.
Sot qaraýy barysynda 2021–2025 jyldar aralyǵynda azamattarǵa aqsha berý qyzmeti «Uralsk zoloto» komıssıondyq dúkeni atyn jamylyp júrgizilgeni anyqtaldy.
Zańsyz qyzmetti jasyrý maqsatynda komıssııa jáne zergerlik buıymdardy saqtaý sharttary rásimdelgen, alaıda is júzinde azamattarǵa ýákiletti organnyń lıtsenzııasynsyz paıyzben qaryz berilgen.
Zańsyz jolmen alynǵan tabys kólemi 155 mln teńgeden asty.
Tergeý barysynda Departament qyzmetkerleri 2000-nan astam kelisimshart, elektrondyq tasymaldaǵyshtar, qujattar jáne aqsha qarajattary tárkilendi.
-Sot úkimimen sottalýshy QR QK-niń 214-1-baby 2-bóligi 2-tarmaǵy boıynsha kináli dep tanylyp, oǵan 1 479 600 teńge kóleminde aıyppul salyndy,-delingen habarlamada.
Úkim zańdy kúshine endi.
Osyǵan deıin BQO-da uıaly baılanys operatorlaryna 25 mln astam teńge aıyppul salynǵany týraly jazdyq.
