BQO-da zańsyz qoqys úshin tórt ákim orynbasaryna aıyppul salyndy
ORAL. KAZINFORM – Batys Qazaqstan oblysynda 2025 jyly ǵaryshtyq monıtorıng derekteri boıynsha 183 zańsyz qoqys orny anyqtaldy.
BQO boıynsha Ekologııa departamentiniń basshysy Murat Ermekqalıevtiń óńirlik kommýnıkatsııalar qyzmeti alańynda ótken brıfıngide málim etkenindeı, sonyń ishinde 90-y Báıterek, 35-i Bórli, 27-si Terekti aýdany jáne 31-i Oral qalasynyń úlesine tıedi.
Onyń sózine qaraǵanda, zańsyz qoqystyń 154-i nemese 85 paıyzy joıylǵan.
- Oblystyń tabıǵat qorǵaý prokýrorynyń usynýy boıynsha zańsyz qoqys oryndaryn ýaqytyly joımaǵany úshin Báıterek, Bórli, Terekti aýdandary jáne Oral qalasy ákiminiń orynbasarlary QR Ákimshilik quqyq buzýshylyq kodeksiniń 344-baby 3-bóligine sáıkes jaýapkershilikke tartyldy. Olardyń árqaısysy qysqartylǵan tártippen 50 AEK kóleminde (196,6 myń teńge) aıyppul tóledi, - dedi M.Ermekqalıev.
Onyń aıtýynsha, aýdan ákimderi zańsyz qoqys oryndaryn ýaqytyly joımaýdaǵy negizgi sebep retinde qarjylandyrýdyń jetkiliksiz ekendigin alǵa tartady.
- Taǵy bir erekshe alańdaýshylyq týdyratyn másele – Chapaev, Kaztalov jáne Jalpaqtal aýyldarynda qatty turmystyq qaldyqtar polıgondaryn salý jobalary kóp jyldan beri júzege asyrylmaı keledi. Bulardyń tehnıkalyq-ekonomıkalyq negizdemesi men jobalaý-smetalyq qujattamasy ázirlengen. Jalpy quny 1 mlrd teńgeden aspaıdy. Soǵan qaramastan iske asyrylmaı otyr. Saldarynan sońǵy jeti jylda oblys aýmaǵynda birde-bir jańa QTQ polıgony paıdalanýǵa berilmegen, - dep qosty M.Ermekqalıev.
Eske sala keteıik, budan buryn BQO-da ken ornynda gaz alaýy jaǵylýyna baılanysty taıaýdaǵy aýylǵa keler qaýip bar ma, sony jazǵan edik.