BQO-da zańsyz qarjylyq pıramıdalarǵa 2 myńnan astam adam tartylǵan
ORAL. KAZINFORM — Batys Qazaqstan oblysynda 2025 jyly qarjylyq pıramıdalarmen kúres sanaty boıynsha 5 qylmystyq is tirkeldi.
BQO boıynsha ekonomıkalyq tergep-tekserý departamenti tergeý basqarmasy basshysynyń orynbasary Madııar Palmanovtyń málim etkenindeı, atalǵan zańsyz shemalarǵa oblystyń 2 myńnan astam turǵyny tartylyp, keltirilgen jalpy zalaldyń somasy 470 mln teńgeden asqan.
Onyń sózine qaraǵanda, departamentpen «Imrat Group» atty qarjylyq pıramıdanyń qyzmeti áshkerelenip, toqtatylǵan. Kanadada, Gonkongta jáne Ulybrıtanııada tirkelgen halyqaralyq ınvestıtsııalyq kompanııa retinde kórsetilgen bul qurylym azamattarǵa táýligine 0,5 paıyzdan 1,5 paıyzǵa deıin joǵary tabys ýáde etken.
— Jobaǵa qatysý úshin referaldy silteme arqyly tirkelip, krıptoámııanǵa (USDT balamasynda 20 AQSh dollarynan 10 000 AQSh dollaryna deıin) aqsha salý qajet bolǵan. Al qarajat is júzinde pıramıdanyń qatysýshylary arasynda qaıta bólinip, burynǵy salymshylarǵa tólemder jańa qatysýshylardyń esebinen júrgizilgen. Jańa qatysýshylardy tartý maqsatynda kúdiktiler zańdy ınvestıtsııalyq qyzmet kórinisin qalyptastyrý úshin keń aýqymdy jarnama jasaǵan. Atap aıtqanda, keńseler jaldanyp, jarnamalyq materıaldar ázirlengen. Tanystyrylymdar men konferentsııalar uıymdastyrylyp, sondaı-aq joǵary tabys pen salymdardyń qaýipsizdigi ýáde etilgen aqparattar men beınerolıkter jarııalanyp otyrǵan Telegram-arnasy jumys istegen, — deıdi M.Palmanov.
Onyń aıtýynsha, nátıjesinde pıramıdaǵa 30 azamat tartylyp, 89 mln teńgeden astam qarajat salǵan. Kúdikti tulǵalarǵa qarjylyq pıramıdany basqarý jáne ony jarnamalaý faktileri boıynsha aıyp taǵylyp, qylmystyq is sotqa joldandy.
Qarjylyq pıramıdalardy jarnamalaý zańǵa qaıshy bolyp tabylatynyn jáne tulǵanyń róli men keltirilgen saldarǵa baılanysty ákimshilik nemese qylmystyq jaýapkershilikke ákelip soǵatynyn eskergen jón. Jarnamaǵa azamattardy tartýǵa baǵyttalǵan kez kelgen aqparat taratý jatady. Eń joǵary qylmystyq jaza — tórt jylǵa deıin bas bostandyǵyn shekteý nemese sol merzimge bas bostandyǵynan aıyrý, múlkin tárkileý. Oǵan qosa aıypty dep tanylsa, úsh jylǵa deıin belgili bir laýazymdardy atqarý nemese qyzmetpen aınalysý quqyǵynan aıyrylady.
Eske sala keteıik, budan buryn BQO-da alaıaqtar dropperler arqyly 17 mln astam teńgeni aýdaryp jibergenin jazǵan edik.
Sondaı-aq BQO-da ekonomıkalyq qylmystar boıynsha keltirilgen zalal kólemi 1,6 mlrd teńgeden asty.