BQO-da zańsyz qarý-jaraq pen kıik múıizderi tárkilendi

ASTANA. KAZINFORM — BQO-da "Qarý" jedel aldyn alý is-sharasy barysynda polıtseıler birqatar zańsyz zattardy anyqtady, dep habarlaıdy Polisia.kz.

– Polıtseıler qystaqtaǵy sharýashylyq qojalyǵynyń basshysyna tıesili úıdi tintý kezinde qoldan jasalǵan atys qurylǵysyn, eki ańshy myltyǵyn, eki obrezdi, túrli kalıbrdegi 104 oq-dárini jáne 30 dana kıik múıizin tapty. Úı ıesine qatysty qylmystyq is qozǵalyp, ol ýaqytsha ustaý ızolıatoryna qamaldy, – delingen habarlamada.

Jalpy oblys kóleminde is-shara kezinde zańsyz saqtalǵan 16 qarý tárkilendi. Onyń ishinde 10 ańshy myltyǵy, 2 obrez, 1 vıntovka, 1 travmatıkalyq qarý jáne ózge de 2 qarý bar.

Sonymen qatar 164 oq-dári alyndy, onyń 7-eýi – oıyq uńǵyly, 157-si – tegis uńǵyly qarýǵa arnalǵan.

Oblystyq polıtsııa departamenti zańsyz qarýdy anyqtaý jáne tárkileý jumystary «Zań men tártip» qaǵıdasy aıasynda jalǵasatynyn atap ótti.

Aıta keteıik, Aqtóbe oblysynda turǵynnan aqsha bopsalaǵan kúdiktiler ustalǵanyn jazǵan bolatynbyz.