BQO-da zańdy túrde soıylǵan kıiktiń múıizi qaıda ketip jatyr
ORAL. KAZINFORM – Batys Qazaqstan oblysynda byltyr kıik sanyn retteý jumystary 1 shildeden 30 qarashaǵa deıin júrgizildi.
BQO orman sharýashylyǵy jáne janýarlar dúnıesi aýmaqtyq ınspektsııasynyń málimeti boıynsha bes aı ishinde 108 myń 500 bas kıik aýlanǵan bolatyn.
Osy ýaqyt ishinde zańdy túrde soıylǵan kıiktiń múıizi qaıda ketkeni jóninde Kazinform tilshisi QR Ekologııa jáne tabıǵı resýrstar mınıstrligine arnaıy saýal joldaǵan edi.
Mınıstrlik málimetine sáıkes Batys Qazaqstan oblysynda 2025 jyly kıik popýlıatsııasyn retteý boıynsha júrgizilgen josparly jumys nátıjesinde 91 298 dana múıiz alyndy.
Kúni búgin kıik múıizderi «Ohotzooprom» ÓB» RMQK-nyń Almaty qalasyndaǵy qoımasynda saqtalyp otyr. Ol qatań baqylaýǵa alynǵan.
Birinshiden, múıizder saqtalatyn nysan arnaıy qarýlanǵan kúzet qyzmetimen táýlik boıy kúzetiledi. Bul ruqsatsyz kirý men qundy shıkizattyń urlanýyn múldem boldyrmaıdy.
Ekinshiden, klımattyq baqylaýǵa erekshe mán beriledi. ıAǵnı qoıma ishinde ónimniń sapasyn saqtaý úshin arnaıy temperatýralyq rejım jáne ylǵaldylyq deńgeıi normaǵa saı ustalyp tur. Bul múıizderdiń buzylýy nemese shirýiniń aldyn alady.
Úshinshiden, túgendeý men esep te mańyzdy. Saqtaý birlikteriniń sany únemi tekserilip, júıeli túrde sanaq júrgizilip otyrady. Árbir múıiz nómirlengen jáne arnaıy shtrıh kodpen qatań esepke alynǵan.
Vedomstvonyń málimdeýinshe, qazirgi ýaqytta Qazaqstan Respýblıkacy Saýda jáne ıntegratsııa mınıstrligimen jáne basqa uıymdarmen birlesip kıik múıizderin eksporttaý máselesi talqylanýda. Osy maqsatta zańnamalyq aktilerge tıisti túzetýler ázirlendi, sondaı-aq sheteldik naryq qatar zerttelip jatyr.
– Kıik sanyn retteý jónindegi is-sharalardy júrgizý, múıizderin saqtaý jáne tasymaldaý protsesi Orman sharýashylyǵy jáne janýarlar dúnıesi komıteti aýmaqtyq bólimsheleriniń, sondaı-aq Qazaqstan Respýblıkasy Іshki ister mınıstrligi qyzmetkerleriniń baqylaýymen júzege asyryldy. Osyǵan baılanysty kontrabanda faktileri Batys-Qazaqstan oblysynda tirkelgen joq, - delingen resmı jaýapta.
Eske sala keteıik, budan buryn Batys Qazaqstanda qansha kıik aýlanǵanyn jazǵan bolatynbyz.