BQO-da zań talaptaryn buzǵan qurylys salýshylarǵa 33 mln teńge aıyppul salyndy

ORAL. KAZINFORM – BQO memlekettik sáýlet-qurylys baqylaýy basqarmasyna jyl basynan beri jeke jáne zańdy tulǵalardan 911 ótinish túsken.

Basqarma basshysy Álibek Antazıevtiń málim etkenindeı, atalǵan ótinishterdiń basym bóligi tekserý júrgizýge negiz bolyp esepteledi. 

Álibek Saıynulynyń sózine qaraǵanda, ótinish berýshiler zańsyz qurylys salý, nysannyń qala qurylysy normalary men talaptaryna sáıkessizdigi, atqarylǵan jumystardyń sapasyna qatysty, belgilengen qabat sanynan asyp ketý jáne sáýlet-josparlaý tapsyrmasy talaptaryn saqtamaýǵa nazar aýdarady. 

- Tekserýler nátıjesinde jeke tulǵalarǵa qatysty 70, jeke kásipkerlerge 20, JShS-ǵa 43, memlekettik mekemege 3, barlyǵy 136 hattama toltyryldy. Sonyń ishinde tapsyrys berýshige 114, merdigerge 7, tehnıkalyq qadaǵalaý boıynsha 8, avtorlyq qadaǵalaý – 5, tehnıkalyq tekserý men saraptamaǵa qatysty bir-birden hattama tirkeldi. Jospardan tys 73 tekserý qorytyndysymen 57 nusqama berilip, 136 ákimshilik is qozǵaldy jáne 33 mln astam teńge aıyppul salyndy, - dedi Á.Antazıev.

Onyń aıtýynsha, qaıta jańartylyp jáne kúrdeli jóndeýden ótkizilip jatqan jol nysandaryna da jospardan tys tekserýler júrgizilip jatyr. Sonyń nátıjesinde 10 ákimshilik hattama toltyryldy. Bul baǵytta «Jol aktıvteriniń ulttyq sapa ortalyǵy» RMK BQO fılıalymen birlesken jumystar atqarylǵan. 

Basqarma basshysynyń málimdeýinshe, óreskel nemese júıeli sıpattaǵy zańbuzýshylyqtar anyqtalǵan jaǵdaıda lıtsenzııadan jáne akkredıtteýden aıyrý týraly máseleni qaraýǵa bastamashylyq jasaý qajettiligi týyndaıdy. Jyl basynan beri osyndaı sanattaǵy 4 is sotqa joldandy. Sonymen qatar tehnıkalyq jáne avtorlyq qadaǵalaý mamandarynyń 6 attestatynyń qoldanylýy toqtatyldy.

Taǵy bir másele, 4 turǵyn úıdiń quqyq belgileıtin jáne ruqsat berý qujattarynsyz salynǵany anyqtaldy. Tekserý nátıjeleri boıynsha materıaldar sot organdaryna joldanyp, birqatar nysanǵa aıyppul sanktsııalary qoldanyldy. Zańsyz salynǵan qurylystardy májbúrli túrde buzý jóninde sheshimder qabyldandy.

- Óz betinshe qurylys salý qoǵamdyq qaýipsizdikke tikeleı qater tóndirip, kórshiles jer paıdalanýshylardyń quqyqtarynyń buzylýyna ákeledi. Qazaqstan Respýblıkasy Azamattyq kodeksiniń 244-babyna sáıkes óz betinshe salynǵan qurylys zańdastyrýǵa jatpaıdy jáne buzylýǵa tıis. Atalǵan talap elimizdiń búkil aýmaǵynda qoldanylady, - dep qosty Á.Antazıev.

Eske sala keteıik, budan buryn Batys Qazaqstanda 40-tan astam nysanda qurylys talaptary saqtalmaǵanyn jazǵan bolatynbyz.

Sondaı-aq Oralda turǵyndar jańadan salynǵan úıge nelikten kire almaı otyrǵany jazyldy. 

Oralda úleskerlerdiń máselesin sheshý jóninde jumys toby qurylatyn boldy.