BQO-da zań buzǵan jol salýshy kompanııa 19,7 mln teńgeni bıýdjetke qaıtardy

ORAL. KAZINFORM — Batys Qazaqstan oblysy Bórli aýdany Bórli aýylynda jol salý kezinde bıýdjet qarjysynyń negizsiz jumsalǵany belgili boldy.

BQO qoǵamdyq keńesiniń múshesi, zańger Baýyrjan Ahmetjannyń Facebook áleýmettik jelisindegi paraqshasynda málim etkenindeı, «Ádildik joly» qoǵamdyq qozǵalysynyń shaǵymyn teksergen BQO boıynsha ishki memlekettik aýdıt departamenti 50,5 mln teńgeniń zań buzýshylyǵyn anyqtady.

- Merdiger «ShamShyń» JShS kinásin moıyndap, bıýdjetke ázirge 19,7 mln teńgeni qaıtardy. Bórli aýdany turǵyn úı-kommýnaldyq sharýashylyq bóliminiń sol kezdegi basshysy Dastan Aqmambetov (qazir Prıýral aýyldyq okrýginiń ákimi) 2022 jyly jasalǵan jumys aktisi bolmaýyna qaramastan, atalǵan kompanııaǵa negizsiz qarjy aýdarǵan, - deıdi B.Ahmetjan.

Onyń aıtýynsha, jolǵa qarajat tólense de, turǵyndar «Ádildik joly» belsendilerine jumys jasalmaǵanyn habarlaǵan.

Goszakup.gov.kz portalynan belgili bolǵanyndaı, 2021 jyly 28 maýsymda Bórli aýdany turǵyn úı-kommýnaldyq sharýashylyq bólimi men «ShamShyń» JShS Bórli aýylynyń ishki jolyn kúrdeli jóndeýge shart jasaǵan. Quny - 335,9 mln teńge, merzimi - 5 aı.

- Alaıda shart mindetteri tolyq ári ýaqytynda oryndalmaǵan. Qoǵamdyq baqylaý yqpalymen aýdan ákimdigi merdigerdi sotqa berdi. Bıylǵy 30 qyrkúıekte BQO mamandandyrylǵan aýdanaralyq ekonomıkalyq sotynyń sýdıasy Ásııa Bısalıeva sheshim shyǵardy. Qaýly zańdy kúshine engennen keıin «ShamShyń» JShS taǵy da 19,5 mln teńgeni bıýdjetke qaıtarýy kerek. Sonymen qatar 11,2 mln teńgeniń jol jóndeý jumysyn qaıta jasaýy tıis. Osy derek boıynsha QR UQK BQO boıynsha departamenti sybaılas jemqorlyqqa qarsy is-qımyl qyzmeti tergeý amaldaryn júrgizip jatyr, - dedi B.Ahmetjan.

Eske sala keteıik, budan buryn Batys Qazaqstanda respýblıkalyq jol bóligi nelikten jóndelmeı qalǵanyn jazǵan edik.