BQO-da vırýstyq menıngıtpen aýrýhanaǵa júginýshiler sany 3,7 esege artqan

ORAL. KAZINFORM – Sońǵy kezde Batys Qazaqstan oblystyq juqpaly aýrýlar aýrýhanasyna naýqastardyń qaralý sany 18,4 paıyzǵa ósti.

Aýrýhana dırektory Nadııa Ahmetovanyń óńirlik kommýnıkatsııalar qyzmeti alańynda ótken brıfıngte málim etkenindeı, sonyń ishinde bakterııalyq etıologııanyń jiti ishek ınfektsııalarymen júginýshiler 79,3, qyzylshamen 83,3 paıyzǵa, vırýstyq menıngıtpen 3,7 esege, enterovırýstyq ınfektsııalarmen 2,6 jáne pnevmonııamen aýyrǵandar 1,5 esege artqan. 

Onyń sózine qaraǵanda, atalmysh aýrýhana eresekter men balalardy juqpaly aýrýlardan emdeý úshin tegin medıtsınalyq kómektiń kepildendirilgen kólemi boıynsha qyzmet etedi. 

«Biz táýlik boıy jumys jasaımyz, aımaqtaǵy juqpaly aýrýlar patologııasy boıynsha oflaın-onlaın rejımde keńes beremiz, sonymen qatar aýdandarǵa da baryp, kómek kórsetemiz. Aýrýhanada barlyǵy 190 tósek-oryn bolsa, sonyń 140-y – ınfektsııalyq tósek, munyń 100-i balalarǵa arnalǵan. Oǵan qosa 50 ońaltý tósek-orny (10-y balalar úshin) bar», deıdi N.Ahmetova.

Dırektordyń aıtýynsha, aýrýhanada biliktiligi joǵary mamandar eńbek etedi. Sonymen qatar mamandardy tartý boıynsha jumystar belsendi júrgizilýde. 

«Qazirgi tańda aýrýhanada dárigerler sany 90,4 paıyzdan 92-ge, medbıkeler 95,7-den 99,8 paıyzǵa artyp otyr. Kishi medıtsına qyzmetkerleriniń sany jalaqynyń tómendigi jáne juqpaly aýrýlar boıynsha epıdemııa kezeńinde joǵary júkteme saldarynan 94,9-dan 88,4 paıyzǵa azaıǵany baıqalady. Kúni búgin 12 kishi medıtsına qyzmetkeri qajet», dedi aýrýhana basshysy.

Eske sala keteıik, budan buryn Batys Qazaqstanda 400-ge jýyq náresteniń týberkýlezge qarsy ekpe almaǵanyn jazǵan edik.