BQO-da veterınarııalyq talaptyń buzylýyna baılanysty 18,4 tonna ónim keri qaıtaryldy
ORAL. KAZINFORM — Batys Qazaqstan oblysynda Reseımen shektesetin «Syrym» veterınarııalyq baqylaý beketinde veterınarııalyq talap buzýshylyq anyqtaldy.
Aýyl sharýashylyǵy mınıstrligi Veterınarııalyq baqylaý jáne qadaǵalaý komıteti BQO aýmaqtyq ınspektsııasynan málim etkenindeı, atalǵan bekette 17 tamyz kúni Reseıdiń Kalınıngrad oblysy, Nevskoe aýylynan Ózbekstan astanasy Tashkent qalasyna baǵyt alǵan, sıyr etinen daıyndalǵan salmaǵy 18,4 tonna gambýrger kotletteri tıelgen júk kóligine veterınarııalyq baqylaý júrgizildi.
Qujattamalyq tekserý barysynda veterınarııalyq ilespe qujattardaǵy málimetterge sáıkes, júk óndirýshisiniń QR AShM Veterınarııalyq baqylaý jáne qadaǵalaý komıtetiniń 2025 jylǵy 23 aqpandaǵy № 17-02-10/497 hatyna sáıkes termııalyq óńdeýden ótpegen ónimderdi óndiretini anyqtaldy.
— Osyǵan baılanysty atalǵan júk shyǵý baǵytyna keri qaıtaryldy, al júrgizýshisine QR Ákimshilik quqyq buzýshylyq týraly kodeksiniń 406-babyna sáıkes hattama toltyryldy. Júk tasymaldaýshysyna «Eýrazııalyq ekonomıkalyq odaqta veterınarııalyq-sanıtarııalyq sharalardy qoldaný týraly» Eýrazııalyq ekonomıkalyq odaq komıssııasynyń 2010 jylǵy 18 maýsymdaǵy № 317 sheshimimen belgilengen veterınarııalyq-sanıtarııalyq talaptar túsindirildi, — dep habarlady vedomstvodan.
Eske sala keteıik, budan buryn BQO-da júk tasymaldaýshylarǵa 6,3 mln astam teńge aıyppul salynǵanyn jazǵan edik.
