BQO-da velosıpedine jalaýsha qondyryp, Ánurandy shyrqaǵan qos balaqaı kópshilikti tánti etti
ORAL. KAZINFORM – Qaratóbe aýdany ortalyǵy Qaratóbe aýylynda velosıpedine kók Týdy qondyryp alǵan alty jasar Aqylbekti kósheden jıi kezdestirýge bolady.
Qaratóbe aýdandyq ishki saıasat bóliminiń basshysy Nurtas Safýllınniń Kazinform tilshisine málim etkenindeı, ortalyq alańda oınap júrgen balalardyń biri velosıpedine Memlekettik Tý beınelengen jalaýshany qondyryp alǵanyn kórgen.
«Sol boıda velosıpedtiń kimdiki ekendigin surastyrdym. Sary domalaq súıkimdi baldyrǵan «Meniki» dep jaýap berdi. Aty Aqylbek, jalaýdy velosıpedine ákesi qondyryp bergen bolyp shyqty. Qasyndaǵy balanyń esimi Qýanysh eken. «Elimizdiń Ánuranyn bilesińder me?» dep edim, qoldaryn júrek tusyna qoıyp, shyrqaı jóneldi. Osy beınejazbany Feısbýk áleýmettik jelisindegi paraqshama júktep edim, qos balaqaıdyń tátti qylyǵy kópshilikti súısindirdi. Patrıot balalarǵa rızashylyǵyn bildirip, aq tilegin jaýdyrǵandar az bolǵan joq», - deıdi Nurtas Safýllın.
Alty jastaǵy Aqylbek Asqardyń ákesi Asylanbek Tóleýǵalıevtiń aıtýynsha, ol zaıyby Aqzatpen birge úsh bala tárbıelep otyr eken. Qyzy Aılına 8-synypty, úlken uly Aqnıet 5-synypty, Aqylbek 1-synypty bitirgen.
«Qaratóbe» sport klýby aýyr atletıka úıirmesiniń tárbıelenýshisi Aqnıet aýdanymyzdyń, óńirimizdiń namysyn qorǵap, balalar men jasóspirimder arasynda halyqaralyq, respýblıkalyq, oblystyq jarystarda júldeger atanyp júr. Batys Qazaqstan oblysy jasóspirimder qurama komandasynyń múshesi, 1 dárejeli sportshy. Balalarymnyń barlyǵy da óz eliniń, ólkesiniń patrıoty bolyp ósip kele jatyr. Bul Muhıt atyndaǵy jalpy orta bilim beretin mektebindegi ustazdary bergen bilimi men tárbıeniń ıgi jemisi dep oılaımyn. Aqylbek aǵasynyń sporttyq jarystarda top jarǵan júldelerin maqtan tutyp, elimizdiń memlekettik rámizderiniń biri – Týymyzdy velosıpedine taǵyp júr. Jalpy, jalaýdy óziniń qalaýy boıynsha taǵyp berýdi suraǵan bolatyn. Aqylbek mektepte bolatyn synyparalyq is-sharalarǵa belsene qatysady. Zaıybym Aqzat Qaıdarqyzy Esqalıeva «Qaratóbe kolledji» MQKK-de oqytýshylyq qyzmet atqarady», - dedi Asylanbek Asqaruly.
Alty jasar Aqylbektiń ózi Ánurandy mektepte muǵalimi Gúljanat Maqsotqyzynyń úıretkenin, qazaq tili sabaǵyn jaqsy kóretinin, bolashaqta fýtbolshy bolǵysy keletinin aıtty.
Aqylbekpen Ánurandy birge shyrqaǵan Qýanysh Qubaı Muhıt mektebiniń 3-synybyn támamdaǵan.
«Balam mektepte sabaǵyn jaqsy oqıdy. Elin súıetin úlgili ul bolyp ósip kele jatqanyna qýanyshtymyz. Ákesi Rıshat Jumaǵalıev ekeýmizdiń kózqýanyshymyz osy Qýanysh. Balamyz aldaǵy ýaqytta da tek qýanta berse eken deımiz», -dedi Qýanyshtyń anasy Baqytqanym Tolǵanbaeva.
