BQO-da uzyndyǵy 349 shaqyrym gaz qubyry apatty dep tanyldy

ORAL. KAZINFORM — Batys Qazaqstan oblysynda tozyǵy jetken gaz qubyrlaryn qaıta jańartý boıynsha birneshe jobany júzege asyrý kózdelip otyr.

BQO energetıka jáne turǵyn úı-kommýnaldyq sharýashylyq basqarmasy basshysynyń orynbasary Murat Qonysbaevtyń óńirlik kommýnıkatsııalar qyzmeti alańynda málim etkenindeı, sonyń biri – 55 myńǵa jýyq turǵyny bar 65 eldi mekenge gaz jetkizip otyrǵan Rostoshı-Taıpaq joǵary qysymdy gaz qubyry.

Murat Keńesulynyń sózine qaraǵanda, atalǵan gaz qubyry búgingi tańda apatty dep tanylyp otyr. Qubyrdyń jalpy uzyndyǵy – 349 shaqyrym.

- Tozyǵy jetken qubyrlardy eki kezeńmen aýystyrý josparlanyp otyr. Birinshi kezeńde 100 shaqyrym gaz qubyry aýystyrylatyn bolady. Bul maqsatqa bıyl respýblıkalyq bıýdjetten 1 mlrd teńge bólindi. Qazirgi tańda qurylys jumystary bastaldy. Jobalar qarjylandyrý máselesiniń oń sheshilýine qaraı júzege asyrylatyn bolady, - dedi M.Qonysbaev.

Onyń aıtýynsha, sońǵy úsh jylda óńirde gazdandandyrý salasyna 1,5 mlrd teńge baǵyttalyp, 3,5 myńnan astam turǵyny bar 25 eldi mekenge «kógildir otyn» jetkizildi. Kúni búgin oblys boıynsha 336 eldi meken gazben tolyqtaı qamtylǵan. Bul jóninen óńir kórsetkishi 99,8 paıyzǵa jetti. Sonymen qatar Aqjaıyq, Báıterek, Jańaqala jáne Tasqala aýdandarynyń alty eldi mekenin 800 mln teńgege gazdandyrý boıynsha birneshe joba daıyn. 

- Oǵan qosa Oral qalasynda «Aqjaıyq» shaǵynaýdany jańadan boı kóterip jatqany belgili. Osyny eskere otyryp, qýattylyǵy 150 myń tekshe metr avtomattandyrylǵan gaz taratý stantsııasyn salý boıynsha joba jasaqtaldy. Atalǵan joba jańa shaǵynaýdandaǵy barlyq áleýmettik nysan, turǵyn úılerdi gazben úzdiksiz qamtýǵa múmkindik beredi, - dep qosty basqarma basshysynyń orynbasary.

Eske sala keteıik, budan buryn Oralda avtogaz quıý stantsııalarynda uzyn-sonar kezek tyıylmaı turǵanyn jazǵan edik.