BQO-da úzdik ustazdar marapattaldy
ORAL. QazAqparat - Oral qalasynda Muǵalimder kúnine oraı «Ustaz - uly esim» atty saltanatty jıyn bolyp, onda bilim salasynyń úzdikteri marapattaldy, dep habarlaıdy «QazAqparat» tilshisi.
Sharaǵa qatysqan oblys ákiminiń orynbasary Bıbigúl Qonysbaeva muǵalim mamandyǵynyń qaı kezde de asa qajetti de mańyzdy ekendigin jetkizdi. Elbasy Nursultan Nazarbaev bilim sapasynyń joǵarylyǵy, túptep kelgende, ult pen memlekettiń básekege qabiletti bolýynyń kepili ekendigin únemi aıtyp, osy salaǵa udaıy kóńil bólip keledi. Kóp nárse muǵalimniń bilimi men tájirıbesine baılanysty. Bilimdi, rýhanı jaǵynan baı urpaq tárbıeleýde ustazdardyń eńbegi zor. Ásirese, qazirgideı jańartylǵan bilim mazmuny, ozyq tehnologııalar engizilip jatqan mezgilde olarǵa úlken jaýapkershilik júkteledi.
Jıyn barysynda sala ardagerleri, jańashyl ustazdar, jastar tálimgerleri marapattaldy. Atap aıtqanda, QR Bilim jáne ǵylym mınıstrliginiń Y.Altynsarın atyndaǵy tósbelgisi Qaztalov aýdany Ǵ.Qarash atyndaǵy Qaraoba mektep-gımnazııasy qazaq tili men ádebıeti pániniń muǵalimi Lázzat Esekenovaǵa, «Bilim berý isiniń qurmetti qyzmetkeri» tósbelgisi bilim jáne ǵylym qyzmetkerleri oblystyq kásipodaq uıymynyń tóraǵasy, pedagogıka ǵylymdarynyń kandıdaty, professor Marat Daýpaev, Jánibek aýdandyq bilim berý bólimi ádistemelik kabınetiniń meńgerýshisi Aqqý Nurǵalıeva, Bórli aýdany Aqsaı qalasyndaǵy №3 orta mektebiniń bastaýysh synyp muǵalimi Gúlnár Esmaǵulovaǵa tabys etildi. Bir top ustaz oblys ákiminiń alǵyshatyna ıe boldy. «Ustazǵa taǵzym» atalymy boıynsha úzdikter, izdenimpaz mektep basshylary da umyt qalǵan joq. «Jyl ustazy», «Zamanaýı ádisker», «Jalyndy jas maman» atalymdary jáne «2017 jyldyń úzdik pedagogi» respýblıkalyq baıqaýynyń jeńimpazdaryna qurmet kórsetildi. Al «Ustazdar áýleti» atalymy boıynsha Bókeı ordasy aýdanynan Sabyrovtar (jalpy pedagogıkalyq ótili - 249 jyl), Tasqaladan Turǵanálıevter (196 jyl), Aqjaıyqtan Qulbaraqovtar (190 jyl) otbasylary ozyp shyqty.
