BQO-da úıýli turǵan 150 tonna shóp janyp ketti
ORAL. QazAqparat – Batys Qazaqstan oblysynda úıýli turǵan 150 tonna shóp janyp ketti, dep habarlaıdy QazAqparat tilshisi.
BQO TJ departamentiniń baspasóz qyzmeti málim etkendeı, oqıǵa 16 qyrkúıek kúni saǵat 04.28-de Qaratóbe aýdany Aqqozy aýyldyq okrýginde bolǵan.
«Dosjan» sharýa qojalyǵyna qarasty Besshaǵyl qystaǵynda jınaýly turǵan 150 tonna pishen jandy.
Órt saǵat 12.28-de oqshaýlanyp, 12.51-de sóndirildi. Ony aýyzdyqtaýǵa TJ departamentinen 11 qyzmetker, 2 tehnıka, erikti órt sóndirý qurylymynan 6 adam, 2 tehnıka qatysty. Sondaı-aq aýdandyq polıtsııa bóliminen 2 qyzmetker, 1 tehnıka oqıǵa ornyna bardy.
Qazirgi kezde órttiń shyǵý sebebi, keltirilgen shyǵyn anyqtalý ústinde.
TJ departamenti sharýa qojalyqtary basshylarynan iri kólemdegi mal azyǵyn turǵyn úı men aýladan, joldan alys jerde saqtaýdy usynady.
Eske sala keteıik, budan buryn Batys Qazaqstanda 60-tan astam dala órti tirkelgenin jazǵan bolatynbyz.
