BQO-da uıaly baılanys operatorlaryna 25 mln astam teńge aıyppul salyndy
ORAL. KAZINFORM — Batys Qazaqstan oblysynda barlyǵy 405 aýyl bolsa, sonyń 364-inde nemese 90 paıyzynda ınternet jelisi qoljetimdi.
BQO tsıfrlyq tehnologııalar basqarmasynyń basshysy Nurǵısa Qamashevtiń málim etkenindeı, óńirdegi eldi mekenderdiń basym bóliginde ınternet 4G, 3G, 2G, sondaı-aq talshyqty-optıkalyq, spýtnıktik termınaldar jáne radıokópir tehnologııalary arqyly qamtamasyz etilgen. Dybystyq uıaly baılanys 376 aýylda, ıaǵnı 93 paıyzynda bar.
Onyń sózine qaraǵanda, 2025 jyly Bılaın jáne Ksell operatorlarymen uıaly baılanystyń sapasyn jaqsartý maqsatynda 21 aýylǵa jańa bazalyq stantsııa ornatyldy.
Oǵan qosa 202 eldi mekenniń qoldanystaǵy bazalyq stantsııalaryna 4G standartyna deıin jańartý jumystary júrgizildi.
- Memleket basshysy Qasym-Jomart Toqaev «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýynda «...Keıbir shekara jáne keden beketinde sapaly ınternet joq. Bul da jurttyń narazylyǵyn týǵyzady. Osyndaı keleńsiz jaǵdaılardy tez arada túzetýimiz qajet», degen bolatyn. Osy rette 2025 jyly baılanys operatorlarymen «Syrym» jáne «Tasqala» avtokólik ótkizý beketteri mobıldi ınternet jelilerimen qamtamasyz etildi. Búgingi tańda «Aqsaı» avtokólik ótkizý beketine bazalyq stantsııa ornatý kózdelýde, - deıdi basqarma basshysy.
Onyń aıtýynsha, bıyl baılanys operatorlarymen Oral men Aqsaı qalalarynda, sondaı-aq 10 aýylda jańa bazalyq stantsııalar salý, taǵy 8 eldi mekende burynnan bar stantsııalardy qaıta jańartý josparlanǵan. Birinshi toqsanda Bılaınmen 2, Ksell operatorymen taǵy eki aýylda bazalyq stantsııalar ornatyldy.
Basqarma derekterine sáıkes baılanys sapasyn baqylaý maqsatynda óńiraralyq baılanys ınspektsııasy bıylǵy birinshi toqsanda jospardan tys 10 tekserý júrgizdi. Sonyń nátıjesinde baılanys operatorlaryna 25,3 mln teńge ákimshilik aıyppul salyndy. 2025 jyly jospardan tys 21 tekserýden keıin 38,2 mln teńge aıyppul salynǵan edi.
- 2023 jyly 27 qazanda Qazaqstan Respýblıkasy Úkimetiniń № 949 qaýlysymen baılanys salasyndaǵy «Qoljetimdi Internet» ulttyq jobasy bekitilgeni belgili. Búgingi tańda ulttyq jobany oryndaý aıasynda aýyldarǵa talshyqty-optıkalyq baılanys jelisi, oblys ortalyǵyna 5G standartyndaǵy ınternet jáne respýblıkalyq avtokólik joldaryn mobıldi ınternet jelisimen qamtamasyz etý jumystary júrgizilýde, - dep qosty N.Qamashev.
Eske sala keteıik, budan buryn Batys Qazaqstanda 413 eldi mekenniń 334-i ınternetke qosylǵanyn jazǵan edik.
Sondaı-aq BQO-da uıaly baılanys operatorlary 13,8 mln teńge aıyppul arqalady.
